மாட்டு தொழுவமாக மாறிய அரசு பள்ளி மாணவ - மாணவியர் அச்சம்

ஊத்துக்கோட்டை: அரசு உயர்நிலைப் பள்ளி வளாகம் மாட்டு தொழுவமாக மாறியதால், மாணவர்கள் அச்சத்துடன் சென்று வருகின்றனர். பூண்டி ஒன்றியம் மாம்பாக்கம் அரசு உயர்நிலைப் பள்ளியில், ஆறாம் வகுப்பு முதல் 10ம் வகுப்பு வரை, 200க்கும் மேற்பட்ட மாணவ - மாணவியர் பயின்று வருகின்றனர். இதில், 10க்கும் மேற்பட்ட ஆசிரியர்கள் பணியாற்றி வருகின்றனர். பள்ளி திறந்தபடி உள்ளதால், விடுமுறை நாட்கள், மாலை வேளைகளில் மாடுகள் கட்டப்படுகின்றன. மேலும், பள்ளி நுழைவாயிலில் குப்பை கொட்டப்பட்டுள்ளது. இதனால், துர்நாற்றம் வீசுவதுடன், நோய் பரவும் அபாயம் ஏற்பட்டுள்ளது. பள்ளி வளாகத்தில் உள்ள நீர்த்தேக்க தொட்டியின் குழாய் சேதமடைந்து தண்ணீர் கசிந்து வீணாகிறது. மேலும், தொட்டி முழுவதும் பாசி படர்ந்து துர்நாற்றம் வீசுகிறது. வகுப்பறை கட்டட பின்பகுதியில், அதிகளவில் செடிகள் வளர்ந்துள்ளதால், தேள், பாம்பு, பூரான் உள்ளிட்ட விஷ ஜந்துக்கள் வகுப்பறைக்குள் புகுந்து விடுகின்றன. இதன் காரணமாக, பள்ளி மாணவ - மாணவியர் மற்றும் ஆசிரியர்கள் ஒருவித அச்சத்துடன் தவித்து வருகின்றனர். எனவே, மாவட்ட கல்வி அதிகாரிகள், மாம்பாக்கம் உயர்நிலைப் பள்ளியில் ஆய்வு செய்து, மாணவ - மாணவியரின் பாதுகாப்பை உறுதிசெய்ய வேண்டும் என, பெற்றோர் கோரிக்கை விடுத்துள்ளனர்.