நெற்பயிரில் இலை சுருட்டு புழு பாதிப்பா? விவசாயிக்கு வேளாண் துறை ஆலோசனை

பொன்னேரி: நெற்பயிர்களில் இலை சுருட்டு புழு பாதிப்பு குறித்து, வேளாண் துறையினர் ஆய்வு செய்து, விவசாயிகளுக்கு ஆலோசனை வழங்கி வருகின்றனர். மீஞ்சூர் வேளாண் வட்டாரத்தில், 33,000 ஏக்கரில் நெல் பயிரிடப்பட்டு உள்ளது. தற்போது, இலுப்பாக்கம், பனப்பாக்கம் உள்ளிட்ட பல்வேறு கிராமங்களில் பயிரிடப்பட்டுள்ள நெற்பயிர்களில், இலை சுருட்டு புழு பாதிப்பு ஏற்பட்டுள்ளதாக விவசாயிகள் தெரிவித்தனர். இதையடுத்து, திருவள்ளூர் வேளாண் அறிவியல் நிலையத்தின், வேளாண் தொழில்நுட்ப வல்லுநர் முனைவர் குமரேசன், மீஞ்சூர் வேளாண் உதவி இயக்குநர் டில்லிகுமார் மற்றும் வேளாண் அலுவலர்கள், பாதிப்பிற்கு உள்ளான கிராமங்களில் களஆய்வு மேற்கொண்டனர். ஆய்விற்கு பின், வேளாண்மை அறிவியல் நிலைய அதிகாரிகள் கூறியதாவது: இலை சுருட்டு புழு தாக்குதல் இருக்கும் நெற்பயிர்களின் அறிகுறியாக, இலைகள் நீளவாக்கில் மடிக்கப்பட்டு இருக்கும். இலைகளின் பச்சை நிற திசுக்களை புழுக்கள் சுரண்டுவதால், இலைகள் வெண்மையாக மாறி காய்ந்துவிடும். இலை சுருட்டு புழு தாக்குதல் இருக்கும் நெற்பயிர்களில், தேவைக்கு அதிகமாக தழைச்சத்து உரங்கள் இடுவதை தவிர்க்க வேண்டும். வரப்புகளை சீராக்கி சுத்தமாக வைக்க வேண்டும். வேப்பங்கொட்டை சாறு அல்லது வேப்பம் எண்ணெய் ஆகியவற்றை தெளிக்க வேண்டும். அதிகமான தாக்குதல் இருப்பின் ஏக்கருக்கு, 'புளுபென்டிமைட்' 20 கிராம், 'பைப்ரினில்' 400 மில்லி ஆகியவற்றில், ஏதேனும் ஒன்றை 200 லிட்டர் தண்ணீரில் கலந்து தெளித்து கட்டுப்படுத்தலாம். இவ்வாறு அவர்கள் கூறினர்.