கோபாலபுரத்தில் உடைந்த தரைப்பாலம் கார் சிக்கியதால் வாகன ஓட்டிகள் பீதி

ஆவடி: கோபாலபுரம் பிரதான சாலை, சேக்காடு பகுதியில் உடைந்த தரைப்பாலத்தில் சிக்கிய காரை, வாகன ஓட்டிகள் மீட்டனர். இதுபோன்ற சம்பவம் அடிக்கடி நடப்பதால், பாலம் வழியே செல்ல அவர்கள் பீதியடைகின்றனர். ஆவடி அடுத்த பட்டாபிராம், கோபாலபுரம் பிரதான சாலை, பத்மாவதி கார்டன் அருகே, எட்டு ஆண்டுகளுக்கு முன் சேக்காடு, கோபாலபுரம் பகுதியை இணைக்கும் வகையில், தரைப்பாலம் அமைக்கப்பட்டது. 20,000க்கும் மேற்பட்ட பகுதி மக்கள், இந்த சுரங்கப்பாதை வழியாக ஆவடிக்கு சென்று வருகின்றனர். தரைப்பாலம் அருகே ஆபத்தான பள்ளம் ஏற்பட்டு வலுவிழந்து வருவதாக, நம் நாளிதழ் ஏற்கனவே செய்தி வெளியிடப்பட்டு இருந்தது. அதை, ஆவடி மாநகராட்சி அதிகாரிகள் கண்டுகொள்ளவில்லை. இந்நிலையில், இரு நாட்களுக்கு முன், 24 சக்கரங்கள் உடைய அதிக பாரம் ஏற்றி சென்ற கனரக லாரி, தரைப்பாலம் மீது சென்றது. அப்போது தரைப்பாலம் நடுவில் உடைந்து, ஆபத்தான வகையில் பள்ளம் ஏற்பட்டுள்ளது. தகவலறிந்த ஆவடி மாநகராட்சி அதிகாரிகள், தரைப்பாலத்தை ஆய்வு செய்தனர். ஆனால், அப்பள்ளத்தை சீரமைக்க எந்த நடவடிக்கையும் எடுக்கவில்லை. இந்நிலையில், நேற்று முன்தினம் இரவு, தரைப்பாலத்தில் பயணியரை ஏற்றிச் சென்ற கார், அந்த பள்ளத்தில் சிக்கியது. அவ்வழியாக சென்றோர், காரை பத்திரமாக மீட்டனர். வாகன ஓட்டிகள், அடிக்கடி இந்த பள்ளத்தில் சிக்குவதால், பீதியடைந்துள்ளனர். எனினும், வாகன ஓட்டிகள் விபத்தில் சிக்காமல் இருக்க, பள்ளத்தில் கொம்பு, செடிகளை நட்டுள்ளனர். வாகனங்கள் தொடர்ந்து செல்வதால், தரைப்பாலம் மேலும் வலுவிழந்து வருகிறது. எனவே, அசம்பாவிதம் ஏற்படும் முன், அவ்வழியில் போக்குவரத்து தடை செய்ய வேண்டும் என, கோரிக்கை வலுத்துள்ளது. மாநகராட்சி அதிகாரிகள் கூறுகையில், 'தரைப்பாலத்தில் போக்குவரத்து தடை செய்ய நடவடிக்கை எடுக்கப்படும். மழைக்காலம் முடிந்ததும் 22 லட்சம் ரூபாய் மதிப்பீட்டில் புதிய தரைப்பாலம் அமைக்கப்படும்' என்றனர்.