பராமரிப்பு இல்லாத பள்ளி வளாகம் பெற்றோர் அதிருப்தி

ஆர்.கே.பேட்டை: அங்கன்வாடி மையத்துடன் ஒருங்கிணைந்து அமைந்துள்ள அரசு பள்ளி வளாகம், பராமரிப்பு இன்றி சீரழிந்து வருகிறது. இதனால், பெற்றோர் அதிருப்தி அடைந்துள்ளனர். ஆர்.கே.பேட்டை ஒன்றியம், வீரமங்கலம் ஊராட்சிக்கு உட்பட்ட வீரகோவில் மோட்டூரில் அரசு தொடக்க பள்ளி செயல்பட்டு வருகிறது. இதே வளாகத்தில் அங்கன்வாடி மையமும் அமைந்துள்ளது. இந்த வளாகத்தில், ஐந்து ஆண்டுகளுக்கு முன் ஏராளமான மரக்கன்றுகள் நடப்பட்டன. தற்போது, இந்த மரக்கன்றுகள் வளர்ந்து காடாக மாறியுள்ளது. இந்த மரங்களுக்கு கீழே ஏராளமான செடி, கொடிகள் வளர்ந்துள்ளன. இதனால், பள்ளி வளாகத்தில் விஷ பூச்சிகளின் அபாயத்தால், பெற்றோர் அச்சத்தில் தவிக்கின்றனர். தேசிய ஊரக வேலை உறுதித் திட்டத்தின் கீழ், அரசு பள்ளி வளாகத்தில் துாய்மை பணி மேற்கொண்டு, சுத்தமாக பராமரிக்க நடவடிக்கை எடுக்க வேண்டும் என, பெற்றோர் கோரிக்கை விடுத்துள்ளனர்.