விவசாயிகள் போர்வையில் ஆந்திர நெல் விற்கும் வியாபாரிகள்.. தில்லுமுல்லு! முறைகேட்டால் கொள்முதல் நிலையங்களை மூட அதிரடி உத்தரவு

திருவள்ளூர்: வியாபாரிகள் ஆந்திர நெல் வாங்கி வந்து, விவசாயிகள் போர்வையில் திருவள்ளூர் மாவட்டத்தில் அமைக்கப்பட்டுள்ள கொள்முதல் நிலையங்களில் விற்று முறைகேட்டில் ஈடுபட்டு வந்துள்ளனர். இதுகுறித்த குற்றச்சாட்டுகள் பூதாகரமாக வெடித்ததை அடுத்து, நடப்பு ஆண்டில், அனைத்து நேரடி கொள்முதல் நிலையங்களும் உடனடியாக மூடப்படும் என, கலெக்டர் பிரதாப் அறிவித்துள்ளார். திருவள்ளூர் மாவட்டத்தில், நடப்பு சொர்ணவாரி பருவத்தில், 65,325 ஏக்கர் பரப்பளவில் நெல் சாகுபடி செய்யப்பட்டுள்ளது. விவசாயிகளிடம் இருந்து நெல் கொள்முதல் செய்வதற்காக, தமிழ்நாடு நுகர்பொருள் வாணிப கழகம் சார்பில் - 63, தேசிய நுகர்வோர் கூட்டமைப்பு நிறுவனம் சார்பில் - 6 என, மொத்தம் 69 இடங்களில் அமைக்கப்பட்டது. இங்கு, 100 கிலோ நெல் மூடை, சன்ன ரகம்- 2,545 ரூபாய் மற்றும் பொது ரகம் 2,500 ரூபாய்க்கு கொள்முதல் செய்யப்பட்டு வருகிறது. இந்நிலையில், மாவட்டத்தில் உள்ள நெல் கொள்முதல் நிலையங்களில், வியாபாரிகள் சிலர், ஆந்திர மாநில நெல்லை வாங்கி வந்து, திருவள்ளூர் மாவட்டத்தில் விற்பனை செய்து வருகின்றனர். இதற்காக, நெல் கொள்முதல் நிலையம் செயல்படும் ஒன்றியங்களுக்கு உட்பட்ட பகுதிகளில், நெல் பயிரிடாத விவசாயிகளின் சிட்ட அடங்கலை பயன்படுத்தி, விற்பனை செய்து வருகின்றனர். இந்த முறைகேட்டிற்கு, கிராம நிர்வாக அலுவலர்களும், வேளாண் ஊழியர்கள் சிலரும் உடந்தையாக செயல்பட்டு வருகின்றனர். இதன் காரணமாக, விவசாயிகள் உற்பத்தி செய்த நெல் கொள்முதல் செய்ய இயலாமல், பல நாட்களாக தேங்கி கிடக்கிறது. கடந்த மாதம் பெய்த வடகிழக்கு பருவமழை காரணமாக, இவ்வாறு கொள்முதல் செய்யப்படாமல் உலர வைத்திருந்த நெல் மணிகள் நனைந்து, முளைப்பு விட்டு சேதமடைந்தது. மேலும், அறுவடை செய்து நீண்ட நாட்களாகியும் கொள்முதல் செய்யப்படாததால், நெல்லின் ஈரப்பத சதவீதம் குறைந்துவிட்டதாக கூறி, நெல் கொள்முதல் மையங்களில் வாங்காமல் அதிகாரிகள் தவிர்த்தனர். இந்நிலையில், சொர்ணவாரி பருவத்திற்கு துவங்கப்பட்ட நெல் கொள்முதல் நிலையங்கள் 50க்கும் மேற்பட்ட இடங்களில் கொள்முதல் முடிந்ததாதால், அவைகள் அனைத்தும் மூடப்பட்டு விட்டன. ஒரு சில இடங்களில் மட்டும், 'டோக்கன்' வழங்கப்பட்ட விவசாயிகளிடம் இருந்து, நெல் கொள் முதல் செய்யப்பட்டது. திருவள்ளூர் கலெக்டர் அலுவலகத்தில், விவசாயிகள் நலன் காக்கும் கூட்டம் கலெக்டர் பிரதாப் தலைமையில் நேற்று நடந்தது. கூட்டத்தில், விவசாயிகள் பேசியதாவது: திருவள்ளூர் மாவட்டத்தில் நெல் கொள்முதல் நிலையங்களில், விவசாயிகள் போர்வையில் வியாபாரிகள், ஆந்திர மாநிலத்தில் இருந்து பெறப்பட்ட நெல்லை விற்பனை செய்து வருகின்றனர். நான்கைந்து ஊராட்சிக்கு உட்பட்ட பகுதிக்கு ஒரு நெல் கொள்முதல் நிலையம் திறக்கப்பட்டது. அதன்படி, அப்பகுதியைச் சேர்ந்த விவசாயிகளிடம் இருந்து மட்டுமே, நெல் கொள்முதல் செய்யப்பட வேண்டும். வேறு பகுதியில் இருந்து நெல் கொள்முதல் செய்யக் கூடாது. இதனால், பல்வேறு முறைகேடு எழுகிறது. இவ்வாறு அவர்கள் தெரிவித்தனர். இந்நிலையில், பள்ளிப்பட்டு, ஆர்.கே.பேட்டை உள்ளிட்ட பகுதிகளைச் சேர்ந்த விவசாயிகள் சிலர், 'தங்கள் பகுதியில் இன்னும் நெல் கொள்முதல் செய்யப்படாமல், டோக்கன் வாங்கி காத்திருக்கின்றனர். எனவே, அவர்களிடம் இருந்து நெல் கொள்முதல் செய்ய வேண்டும்' என்றனர். அதன்பின், கலெக்டர் பிரதாப் கூறியதாவது: மாவட்டத்தில் செயல்பட்ட நெல் கொள்முதல் நிலையங்களில் பலமுறை எச்சரித்தும், வியாபாரிகள் விற்பனை செய்வதாக பலதரப்பு விவசாயிகளிடம் இருந்தும் புகார் வரப் பெற்றுள்ளது. இதற்கு உடந்தையாக, நெல் கொள்முதல் நிலையங்களில் பணிபுரிவோர் செயல்படுவதாகவும், விவசாயிகள் புகார் அளிக்கின்றனர். எனவே, அனைத்து நெல் கொள்முதல் நிலையங்களும் உடனே மூடப்படும். இனி வரும் காலங்களில், ஏற்கனவே நெல் கொள்முதல் நிலையங்களில் பணிபுரிந்தவர்களை, தமிழ்நாடு நுகர்பொருள் வாணிப கழகத்தினர், அடுத்த பருவத்தில் வேறு இடங்களுக்கு மாற்ற வேண்டும். இவ்வாறு அவர் கூறினார்.

75.35 கோடி கிலோ

நெல் கொள்முதல்

திருவள்ளூர் மாவட்டத்தில் சொர்ணவாரி பருவத்தில், 69 நேரடி நெல் கொள்முதல் நிலையம் திறக்கப்பட்டது. அவற்றில் இதுவரை, 9,734 விவசாயிகளிடம் இருந்து, 75.35 கோடி கிலோ நெல் கொள்முதல் செய்யப்பட்டுள்ளது. கொள்முதல் செய்யப்பட்ட நெல் மூடைகள், சேமிப்பு கிடங்கிலும், அரவை ஆலைகளிலும் இருப்பு வைக்கப்பட்டு உள்ளது.