அரசு அலுவலக சுவர்கள் அலங்கோலம்

பல்லடம்: பல்லடத்தில், அரசு சுவர்களை போஸ்டர்கள் அலங்கோலமாக்கி வரும் நிலையில், அதிகாரிகள் கண்டுகொள்ளாமல் உள்ளனர். போட்டி நிறைந்த உலகில், விளம்பரத்துக்காக, பிளக்ஸ் பேனர்கள் வைப்பதும், போஸ்டர்கள் ஓட்டுவதும், நோட்டீஸ்கள் வினியோகிப்பதும் வாடிக்கையாக உள்ளது. இதற்கான வரையறுக்கப்பட்ட விதிமுறைகளை யாரும் பின்பற்றுவதில்லை. அனுமதி பெறாமல் பிளக்ஸ் பேனர்கள், கட் அவுட்கள் வைப்பது, கொடிகள் நடுவது என, விதிமீறல்கள் அதிகரிக்கின்றன. அரசு அலுவலக சுவர்களில் போஸ்டர்கள் ஓட்டுவதும், வாடிக்கையாக உள்ளது. பல்வேறு சேவைகளுக்காக வரும் பொதுமக்கள், அரசு அலுவலகங்களை எளிதில் அடையாளம் காண வேண்டும் என்பதற்காகவே, விதிமுறைகள் பின்பற்றப்படுகின்றன. அரசு அலுவலகங்களில், சுற்றுச் சுவர்கள் பராமரிப்பதே இல்லை என்பதற்கு, போஸ்டர்களே உதாரணமாக உள்ளன. போஸ்டர்கள் ஓட்டுபவர்களை கண்டறிந்து நடவடிக்கை எடுக்காமல், அதிகாரிகள் அலட்சியம் காட்டுவது, விதிமீறல்களை ஊக்குவிப்பது போல் உள்ளது. பெரும்பாலான அரசு அலுவலகங்களின் சுற்றுச்சுவரை போஸ்டர்கள் அலங்கரித்து வரும் நிலையில், இதை தடுப்பதற்கான நடவடிக்கையை அதிகாரிகள் மேற்கொள்ள வேண்டும். இல்லையெனில், அரசு அலுவலகமா என்ற குழப்பம் ஏற்பட்டு, பொதுமக்கள், அரசு அலுவலகங்களை தேட வேண்டிய நிலை ஏற்பட்டுவிடும்.