வக்கீல்கள் கோர்ட் புறக்கணிப்பு

திருப்பூர்: கோர்ட்டில் இ-பைலிங் முறையை கட்டாயமாக்க எதிர்ப்பு தெரிவித்து திருப்பூர் வக்கீல்கள் நேற்று கோர்ட் புறக்கணிப்பில் ஈடுபட்டனர். தமிழகத்தில் உள்ள அனைத்து கோர்ட்களிலும் இ-பைலிங் என்ற முறையில், வழக்கு குறித்த அனைத்து மனுக்களும் 'ஆன்லைன்' வாயிலாக பதிவு செய்யும் நடைமுறை கடந்தாண்டு கொண்டு வரப்பட்டது. இதற்கு வக்கீல்கள் தரப்பில் பெரும் எதிர்ப்பு கிளம்பியது. இதனால், நீதித்துறை சார்பில் உதவி மையங்கள் அமைக்கப்பட்டன. வக்கீல்களுக்கு பயிற்சியும் வழங்கப்பட்டது. வரும் டிச. 1 முதல் இ-பைலிங் முறை மட்டுமே பின்பற்றப்படும். அனைத்து ஆவணங்கள், மனுக்கள் முழுமையாக 'ஆன்லைன்' வாயிலாக மட்டுமே மேற்கொள்ளப்படும் என தெரிவிக்கப்பட்டது. இதற்கு எதிர்ப்பு தெரிவித்து, இ-பைலிங் முறைக்கு தேவையான அனைத்து கட்டமைப்புகளையும் ஏற்படுத்தாமல் இதை கட்டாயமாக்க கூடாது; தற்போதுள்ள நடைமுறையே தொடர வேண்டும் என்று, தமிழ்நாடு - புதுச்சேரி வக்கீல்கள் சங்கங்களின் கூட்டுக்குழு வேண்டுகோள் விடுத்துள்ளது. இதனை வலியுறுத்தி நேற்று அனைத்து கோர்ட்களிலும் புறக்கணிப்பு போராட்டம் அறிவிக்கப்பட்டிருந்தது. நேற்று திருப்பூர் மாவட்டம் முழுவதும் அனைத்து கோர்ட்களிலும் வக்கீல்கள் கோர்ட் நடவடிக்கையில் பங்கேற்காமல் புறக்கணிப்பில் ஈடுபட்டனர். திருப்பூர் ஒருங்கிணைந்த மாவட்ட கோர்ட் வளாகம், அனைத்து தாலுகா பகுதி கோர்ட்கள் உள்ளிட்டவற்றில் வக்கீல்கள் புறக்கணிப்பில் ஈடுபட்டனர். இருப்பினும், நீதிபதிகள், அரசு வக்கீல்கள், கோர்ட் ஊழியர்கள் வழக்கம் போல் பணியாற்றினர். நேற்று விசாரணைக்கு வந்த வழக்குகள் வேறு தேதிகளுக்கு ஒத்திவைக்கப்பட்டது.