பெருமாள் கோவில் கும்பாபிேஷகம்: விழாக்கோலம் பூண்டது சேவூர்

அவிநாசி: ஸ்ரீ கல்யாண வெங்கட்ரமண சுவாமி கோவில் மஹா கும்பாபிேஷகம் நாளை நடப்பதால், சேவூர் விழாக்கோலம் பூண்டுள்ளது. அவிநாசி அருகேயுள்ள சேவூரில், ஆயிரம் ஆண்டுகளுக்கு மேல் பழமையான அழகு ராய விண்ணகரம் என அழைக்கப்படும் ஸ்ரீ கல்யாண வெங்கட்ரமண சுவாமி கோவிலில், நாளை (30ம் தேதி) மஹா கும்பாபிஷேக விழா காலை 7:45 மணிக்கு மேல் 8.45 மணிக்குள் நடைபெறுகிறது. இதனை முன்னிட்டு நேற்று சேவூர் வாலீஸ்வரர் கோவிலில் இருந்து 1008 தீர்த்த குடங்களை பக்தர்கள் எடுத்து, வடக்கு வீதி, சந்தையப்பாளையம், கோபி ரோடு, ராஜவீதி, மாரியம்மன் கோவில் வீதி மற்றும் சேவூர் கைகாட்டி ரவுண்டானா வழியாக சென்று பெருமாள் கோவிலை அடைந்தனர். தீர்த்தக் குடம் சுமந்த பக்தர்களுக்கு கோவில் விழா கமிட்டி சார்பில் அன்னதானம் வழங்கப்பட்டது. நாளை நடக்கவுள்ள கும்பாபிேஷகத்தை முன்னிட்டு, கோவில் முழுவதும் வண்ண விளக்குளால் அலங்காரம் செய்யப்பட்டது. இதனை தவிர, பல இடங்களில், பக்தர்கள் வரவேற்பு பதாகைகளை வைத்துள்ளனர். கோவில் வளாகம் முழுவதும், வாழை மரங்கள், மாவிலை தோரணங்கள் அலங்கரிக்கின்றன. பல ஆண்டுகளுக்கு பின் நடைபெறும் பெருமாள் கோவில் கும்பாபிேஷக வைபவம் காண பக்தர்கள் தவமிருக்கின்றனர்.