குப்பை பிரச்னையை கையாள தெரியவில்லை: மாநகராட்சி மீது பிரேமலதா காட்டம்

திருப்பூர்: திருப்பூரில் தே.மு.தி.க. முகவர் ஆலோசனை கூட்டம், ஹார்வி குமார சாமி திருமண மண்டபத்தில் நேற்று நடந்தது. அதில், பங்கேற்ற அக்கட்சியின் பொதுச்செயலாளர் பிரேமலதா பேசியதாவது: திருப்பூர் மாநகராட்சி நிர்வாகம் கமிஷன், கலெக் ஷன், கரப்ஷன் மூன்றையும் கடைபிடிக்கிறது. துாய்மை பணிகளுக்கு சம்பளம் வழங்குவதில், முறைகேடு நடந்துள்ளது. அதற்கு ஆதாரம் உள்ளது. துாய்மை பணியாளர் சம்பள பிரச்னையை முடிக்கவில்லை. அவர்களுக்கு சாப்பாடு கொடுத்து அமைதிப்படுத்த அரசே திட்டம் போடுகிறது. குப்பை பிரச்னை, 60 வார்டிலும் தலைவிரித்து, போராட்டமாக நடந்து வருகிறது. பாலம், சாலை, மேம்பால பணி ஆமை வேகத்தில் தான் உள்ளது.குப்பை பிரச்னையை சரிவர கையாள தெரியாமல் மாநகராட்சி முற்றிலும் முடங்கி போயுள்ளது. இப்பிரச்னையை மேயருக்கு கையாள தெரியவில்லை. இ.எஸ்.ஐ., மருத்துவமனை முழு பயன்பாட்டு வராமல் உள்ளது. தொழில் நகரில் மக்கள் சிரமத்துடன் தான் வசிக்க வேண்டியுள்ளது. இவ்வாறு அவர் பேசினார்.