எஸ்.ஐ.ஆர். படிவம் திரும்பப் பெறுவதற்கு... முனைப்பு! பி.எல்.ஓ.வுக்கு துணையாக 5 அலுவலர்கள்

திருப்பூர்: திருப்பூர் மாவட்டத்தில் வாக்காளர் பட்டியல் சிறப்பு தீவிர திருத்தப்பணியில், ஓட்டுச்சாவடி நிலைய அலுவலர்களால்(பி.எல்.ஓ.), வாக்காளர்களுக்கு வழங்கப்படும் படிவங்கள், திரும்ப ஒப்படைப்பதில் தேக்கநிலை நிலவுகிறது. டிச. 4க்குள் இவற்றைப் பெறுவதற்காக ஒவ்வொரு பி.எல்.ஓ.வுடன் கூடுதலாக ஐந்து அலுவலர்கள் இணைந்து செயல்பட உள்ளனர்.தேர்தல் கமிஷன் அறிவிப்பு படி, வாக்காளர் பட்டியல் சிறப்பு தீவிர திருத்தப்பணி, கடந்த, 4ம் தேதி தொடங்கி நடந்து வருகிறது. அந்தந்த ஓட்டுச்சாவடி நிலைய அலுவலர்களால், வாக்காளர்களுக்கு, கணக்கீடு படிவம் வழங்கப்பட்டு, வாக்காளர்களிடம் இருந்து அந்த படிவத்தை திரும்ப பெறும் பணி நடந்து வருகிறது. இப்பணி தொடர்பாக, கலெக்டர் மனீஷ் நாரணவரே தலைமையில், கலெக்டர் அலுவலக கூட்டரங்கில் ஆலோசனைக் கூட்டம் நடத்தப்பட்டது. அவர் கூறியதாவது:பூர்த்தி செய்யப்பட்ட வாக்காளர் படிவம், அடுத்த மாதம், 4ம் தேதிக்குள் வாக்காளர்களிடம் இருந்து திரும்ப பெறப்பட வேண்டும். மாவட்டத்தில் வரும் சனி, ஞாயிறு கிழமைகளிலும், ஒட்டுச்சாவடி நிலைய அலுவலர்களுடன் வீடு, வீடாக சென்று கணக்கெடுப்பு படிவங்களை பெறுவதற்கு, துறையின் தலைமை மற்றும் சார்நிலை அலுவலர்கள் முழு ஒத்துழைப்பு வழங்க வேண்டும்.மாவட்டத்தில் கணக்கெடுப்பு படிவங்கள் அதிகளவில் வரப்பெறாமல் உள்ளதால், ஓட்டுச்சாவடி நிலைய அலுவலர்கள் ஒவ்வொருவரும், 5 அலுவலர்களை இணைத்து, எவ்வித விடுபடுதலும் இன்றி, படிவங்களை பெறுவதற்கு நடவடிக்கை மேற்கொள்ள வேண்டும்.இவ்வாறு, அவர் கூறினார்.

ஸ்டேட்டஸ், டி.பி. மூலம் விழிப்புணர்வு

கூட்டத்தில் மாவட்ட செய்தி மற்றும் மக்கள் தொடர்பு துறை சார்பில், இப்பணி குறித்த விழிப்புணர்வு வாசகம் அடங்கிய கார்டு வடிவமைக்கப்பட்டுள்ளது. டிச., 4ம் தேதி இதற்கான இறுதி நாள் என்பதை அறிவிக்கும் வகையில் வாக்காளர் பட்டியல் திருத்தப் பணியில் தங்கள் பங்களிப்பை வாக்காளர்கள் தவறாமல் மேற்கொள்ள அறிவுறுத்தும் வகையில் அதில் வாசகம் வடிவமைக்கப்பட்டுள்ளது. இந்த பதிவை அரசு அலுவலர்கள் தங்கள் வாட்ஸாப்-ல் ஸ்டேட்டஸ் ஆகவும், 'டிபி' யாகவும் வைத்துக் கொண்டு விழிப்புணர்வு ஏற்படுத்த வேண்டும் என கலெக்டர் வேண்டுகோள் விடுத்தார். அதை ஏற்று நேற்று பெரும்பாலான அரசு அலுவலர்கள் அதை தங்கள் செயலியில் மாற்றி அமைத்துக் கொண்டனர்.

படிவம் எங்கே?

ஒவ்வொரு வார்டிலும், வாக்காளர் பட்டியலில் பெயர் இடம் பெற்றுள்ள வாக்காளர்களுக்கான படிவங்கள் முழுமையாக இன்னும் வழங்கப்படாமல் இருக்கிறது. இதுகுறித்து, ஓட்டுச்சாவடி நிலைய அலுவலர்களிடம் தொடர்பு கொண்டு கேட்கும் போது,''உங்களுக்குரிய படிவம் 'மிஸ்' ஆகிவிட்டது; வி.ஏ.ஓ., அலுவலகத்தில் இருந்து இன்னொரு 'பிரின்ட்' வாங்கித் தருகிறோம்'' என, கூறுகின்றனர். வாக்காளர் பட்டியலில் பெயர் இருந்தும், திருத்தப்படிவம் கிடைக்காததால், 'அப்செட்' ஆகியுள்ள வாக்காளர்கள் பலர், இந்த விவகாரத்திலும், கலெக்டர் கவனம் செலுத்த வேண்டும் என எதிர்பார்க்கின்றனர்.--- பி.எல்.ஓ.க்கள் மும்முரம் திருப்பூர் நகரம் மற்றும் ஊரகப்பகுதிகளை பொறுத்தவரை, ஒவ்வொரு வார்டிலும் இடம் பெயர்ந்த வாக்காளர்கள் அதிகம் உள்ளனர். ஒரு வார்டில் இருந்து அருகேயுள்ள வார்டு அல்லது கிராமங்களுக்கு இடம் மாறியவர்களும் இருக்கின்றனர். அவர்களை தேடி பிடிக்க முடியாமல் பி.எல்.ஓ.க்கள் திணறுகின்றனர். அவர்களது மொபைல்போன் எண்ணை, அக்கம் பக்கம் வசிப்போரிடம் இருந்து கேட்டுப் பெற்று, அவர்களை தொடர்பு கொண்டு, மாலை நேரங்களில் தங்கள் வீடுகளுக்கே வரவழைத்து, படிவம் வழங்கி, பூர்த்தி செய்து பெறுகின்றனர். இதனால், பி.எல்.ஓ.,க்களின் வீடுகள் மாலை துவங்கி இரவு வரை 'பிஸி'யாகவே இருக்கின்றன.---