மங்கள வேல் வழிபாடு கிடைத்தற்கரிய பாக்கியம்

பல்லடம்: திருப்பூர் மேற்கு மாவட்ட ஹிந்து முன்னணி சார்பில், மங்கள வேல் வழிபாடு, பல்லடம் என்.ஜி.ஆர்., ரோடு, பொன்காளியம்மன் கோவில் முன்பு நடந்தது. மாவட்ட செயலாளர். சர்வேஸ்வரன் தலைமை வகித்தார். மாநில நிர்வாக குழு உறுப்பினர் செந்தில், மாவட்டச் செயலாளர் ரஞ்சித், நகரப் பொறுப்பாளர்கள் அங்கு ராஜ், விஜய், சுந்தர வடிவேலு ஆகியோர் முன்னிலை வகித்தனர். ஹிந்து அன்னையர் முன்னணி மாவட்டச் செயலாளர் சித்ரா பேசுகையில், 'கோவில்களுக்கு சென்றால், துாரத்தில் இருந்து இறைவனை தரிசிக்கலாமே தவிர நம்மால் அபிஷேகம் செய்ய முடியாது. ஆனால், இறைவனையே நம் கண் முன்னால் கொண்டு வந்து நிறுத்தி, நம் கைகளாலேயே அபிஷேகம் செய்யும் பாக்கியம் 'மங்கள வேல்' வழிபாடு மூலம் நிறைவேறி உள்ளது. பத்து பேர் இணைந்து திருவிளக்கு பூஜை செய்வது என்பது, கோவில் கும்பாபிஷேகம் நடத்துவதற்கு சமமானது என, நம் முன்னோர் கூறுகின்றனர். நம் குழந்தைகளின் கலாசாரம், பண்பாடும் மிகவும் சீரழிந்து வருகிறது. எனவேதான், ஹிந்து முன்னணி சார்பில் பண்பாட்டு வகுப்புகள் நடத்தப்படுகின்றன. இவற்றின் வாயிலாக, விளையாட்டு, யோகா, ஆன்மிகம் உள்ளிட்டவை கற்பித்து தரப்படுகின்றன'' என்றார். முன்னதாக, ரத்தில் எடுத்து வரப்பட்ட மக்கள வேலுக்கு, பக்தர்கள் அனைவரும் அபிஷேகம் செய்து வழிபட்டனர். உலக நலன், தொழில் வளம் மற்றும் குடும்ப நலன் செழிக்க வேண்டி பிரார்த்தனை நடந்தது. சிறப்பு அலங்காரத்தில் முருகப்பெருமான் பக்தர்களுக்கு அருள்பாலித்தார். நிர்வாகிகள் விஜயன், சங்கர், செல்லதுரை, பிரகாஷ் மற்றும் ஹிந்து அன்னையர் முன்னணி நிர்வாகிகள் நிகழ்ச்சியை ஒருங்கிணைத்தனர்.