மாநில சீனியர் கபடி போட்டி: மாவட்ட அணி புறப்பட்டது

திருப்பூர்: மாநில கபடி சாம்பியன்ஷிப் போட்டி கடந்த, 28ம் தேதி துவங்கி நாளை (30ம் தேதி) வரை கிருஷ்ணகிரியில் நடக்கிறது. அதில், பங்கேற்க செல்லும் திருப்பூர் மாவட்ட அணிக்கு வழியனுப்பு விழா, காங்கயம் ரோடு, மாவட்ட கபடி கழக அலுவலகத்தில் நடந்தது. மாவட்ட கபடி கழக சேர்மன் கொங்கு முருகேசன் தலைமை வகித்தார். மாவட்ட செயலாளரும், மாநில பொருளாளருமான ஜெயசித்ரா சண்முகம் முன்னிலை வகித்தார். சிறப்பு விருந்தினராக மாவட்ட விளையாட்டு அலுவலர் ரகுகுமார் பங்கேற்றார். பொருளாளர் கன்னிமார்ஸ் ஆறுச்சாமி, துணைத் தலைவர் ராமதாஸ், செய்தித் தொடர்பாளர் சிவபாலன், மாவட்ட நடுவர் குழு சேர்மன் முத்துசாமி உட்பட மாவட்ட நிர்வாகிகள் பலர் கலந்து கொண்டனர். அணி பயிற்சியாளர் பிரகாஷ், மேலாளர் வினோத், நடுவர் சிவகுரு உடனிருந்தனர். மாநில சாம்பியன்ஷிப் போட்டியில் கலந்து கொள்ளும் வீரர்களுக்கு, விளையாட்டு உபகரணங்கள், சீருடை, ஷூ, பேக் வழங்கி, வாழ்த்து தெரிவிக்கப்பட்டது.