முருங்கைக்காய் சீசன் முன்கூட்டியே துவங்கும்?

பொங்கலுார்: ஐப்பசி, கார்த்திகை மாதங்களில் அடைமழை பொழிவது வழக்கம். மழை அதிகம் பெய்யும்போது முருங்கையில் பூக்கள் உதிர்ந்து விடும். மழை ஓய்ந்தபின் மார்கழி, தை மாதங்களில் முருங்கை பூக்கத் துவங்கி பங்குனி மாதத்தில் முருங்கை காய் அறுவடைக்கு வரும். இந்த ஆண்டு முருங்கை அதிகம் விளையும் திருப்பூர் மாவட்ட பகுதிகளில் பருவமழை பொய்த்துப் போனது. மழையின்றி வெயில் வீசுவதால் முருங்கை மரங்கள் அதிக அளவில் பூக்கத் துவங்கி விட்டன. தற்போது சீசன் இல்லாததால் முருங்கை கிலோ, 300 ரூபாய்க்கு விலை போகிறது. சீசன் காலத்தில் முருங்கை அறுவடைக்கு வந்தால் விலை கடுமையாக சரியும். பறிப்பு கூலிக்கு கூட போதாது. இதை தவிர்க்க கார்த்திகை மாதத்தில் விவசாயிகள் முருங்கையை கவாத்து செய்வது வழக்கம். இதனால் அறுவடை சீசன் தள்ளிப் போகும். அதன் வாயிலாக, ஓரளவு கட்டுப்படியான விலை கிடைக்கும். இனி தொடர் மழை இல்லாவிட்டால் இந்தாண்டு முன்கூட்டியே சீசன் துவங்க வாய்ப்பு உள்ளது. சீசன் காலம் மாறி போவதால் விவசாயிகள் கவாத்துப் பணியை துவங்குவதா, வேண்டாமா என்ற குழப்பத்தில் உள்ளனர்.