காரில் கடத்தப்பட்ட பெண்: துரத்தி சென்று மீட்ட போலீஸ்
உறையூர்: திருச்சியில், காரில் கடத்தப்பட்ட இளம்பெண்ணை, விடாமல் துரத்தி சென்று போலீசார் மீட்டனர். திருச்சி, உறையூரை சேர்ந்த, 24 வயது இளம்பெண், நேற்று காலை உறையூர் சாலையில் நடந்து சென்றபோது, 'ஹூண்டாய் கிரெட்டா' காரில் வந்த நபர், அவரை வலுக்கட்டாயமாக கடத்தி சென்றார். கார், சத்திரம் பஸ் ஸ்டாண்ட் அருகே சென்றபோது, காரில் இருந்த இளம்பெண் கூச்சலிட, அங்கிருந்த போக்குவரத்து போலீஸ்காரர் சுரேஷ், பைக்கில் விரட்டி சென்று ஓடத்துறை பாலத்தில் காரை மடக்கி பிடித்தார். காரில் இருந்த பெண் மீட்கப்பட்டார். காரில் வந்த இருவரும், கோட்டை போலீசாரிடம் ஒப்படைக்கப்பட்டனர். விசாரணையில், அந்த இளம்பெண்ணின் முன்னாள் காதலன், உறையூரை சேர்ந்த உசேன், 23, என்பவர், காரில் அவரை வலுக்கட்டாயமாக கடத்த முயன்றது தெரிய வந்தது. ஸ்ரீரங்கம் மகளிர் போலீசார் விசாரிக்கின்றனர்.