கள்ளக்காதலன் வெட்டி கொலை: காதலி உட்பட மூவருக்கு ஆயுள்

வேலுார்: திருவாரூர் மாவட்டம், மன்னார்குடியை சேர்ந்தவர் இப்ராஹிம். இவரது மனைவி கோகிலா, 40. வேலுார் மாவட்டம், காட்பாடி சர்க்கார் தோப்பில் வாடகை வீட்டில் வசித்தனர். காட்பாடி, வஞ்சூரை சேர்ந்தவர் சுனில், 25; கூலி தொழிலாளி. இவருக்கும், கோகிலாவுக்கும் கள்ளக்காதல் ஏற்பட்டது. இப்ராஹிம் தன் குழந்தைகளுடன், மனைவியை பிரிந்து சென்றார். ஏற்கனவே கோகிலாவுக்கு, மன்னார்குடி மணி, 33, காட்பாடி காந்தி நகர் சதீஷ், 32, ஆகியோருடன் பழக்கம் இருந்துள்ளது. சுனில், மது குடித்து விட்டு, தன்னுடன் மட்டுமே இருக்க வேண்டும் என, கோகிலாவை அடிக்கடி சித்ரவதை செய்து வந்தார். 2020 மே 9ல், கோகிலா, அவரது தந்தை முத்து, 68, மணி, சதீஷ் ஆகியோரை அழைத்து, சுனிலை வெட்டி கொலை செய்தார். விருதம்பட்டு போலீசார், கோகிலா உட்பட நான்கு பேரையும் கைது செய்தனர். கடந்த ஆண்டு முத்து இறந்தார். இவ்வழக்கில், கோகிலா, மணி, சதீஷ் ஆகியோருக்கு ஆயுள் தண்டனையும், தலா, 5,000 ரூபாய் அபராதமும் விதித்து, வேலுார் முதலாவது மாவட்ட கூடுதல் நீதிமன்ற நீதிபதி சாந்தி நேற்று தீர்ப்பளித்தார்.