இந்து ஆட்டோ தொழிலாளர்கள் முன்னணி கையெழுத்து இயக்கம்

விழுப்புரம்: விழுப்புரம் ரயில் நிலையத்தில், இந்து ஆட்டோ தொழிலாளர்கள் முன்னணி சங்கம் சார்பில் ஆட்டோ தொழிலாளர்களுக்கு உதவித் தொகை 15 ஆயிரம் ரூபாய் வழங்கக் கோரி, கையெழுத்து இயக்கம் நிகழ்ச்சி நடந்தது. தமிழகத்தில் பெட்ரோல், டீசல் விலை உயர்ந்த நிலையிலும், ஆன்லைன் வர்த்தகம் மூலம் ஆட்டோக்கள் செல்வதால், ஆட்டோ தொழிலாளர்களின் வாழ்வாரத்திற்காக ஆட்டோ ஓட்டுநர்களுக்கு ஆண்டிற்கு ஒருமுறை உதவி தொகையாக 15 ஆயிரம் ரூபாய் அரசு வழங்க வேண்டும். இந்த கோரிக்கையை வலியுறுத்தி இந்து ஆட்டோ தொழிலாளர்கள் முன்னணி சங்கம் சார்பில் தமிழகம் முழுதும் 4 லட்சம் ஆட்டோ டிரைவர்களிடம் கையெழுத்து பெற்று, இந்த கோரிக்கை மனுவை தமிழக முதல்வரிடம் ஒப்படைக்க முடிவு செய்யப்பட்டு, கையெழுத்து பெறப்பட்டு வருகிறது. விழுப்புரம் ரயில் நிலையத்தில் நடந்த இந்த நிகழ்ச்சியை சங்க ஒருங்கிணைப்பாளர் ரமேஷ், ஆட்டோ டிரைவர்கள் முன்னிலையில் கையெழுத்து போட்டு துவக்கி வைத்தார். மாநில தலைவர் மனோகர் தலைமை தாங்கினார். மாவட்ட தலைவர் சதீஷ்அப்பு முன்னிலை வகித்தார். பொதுச் செயலாளர் சுரேஷ் துரைராஜ், பொருளாளர் விஸ்வநாதன், செயலாளர் தனபால் உட்பட நகர பொறுப்பாளர்கள், ஆட்டோ டிரைவர்கள் பங்கேற்றனர்.