இ-பைலிங் திட்டத்தை ரத்து செய்ய வலியுறுத்தி விழுப்புரத்தில் வழக்கறிஞர்கள் போராட்டம்

விழுப்புரம்: விழுப்புரம் மாவட்டத்தில், நீதிமன்றங்களில் இ பைலிங் திட்டத்தை ரத்து செய்ய வலியுறுத்தி, வழக்கறிஞர்கள் நேற்று வேலை நிறுத்த போராட்டத்தில் ஈடுபட்டனர். தமிழகத்தில் உள்ள நீதிமன்றங்களில், வழக்கு ஆவணங்களை இணைய வழியில் சமர்பிக்கும் இ-பைலிங் என்ற டிஜிட்டல் நடைமுறை திட்டம் வரும் 1ம் தேதி முதல் தொடங்கப்பட உள்ளது. இதற்கு, வழக்கறிஞர்கள் சங்கத்தினர் எதிர்ப்பு தெரிவித்து வருகின்றனர். விழுப்புரம் மாவட்ட வழக்கறிஞர்கள் சங்க கூட்டமைப்பினர், இ-பைலிங் திட்டத்தை ரத்து செய்ய வலியுறுத்தி நேற்று ஒருநாள் வேலை நிறுத்தம் மற்றும் மனித சங்கிலி போராட்டத்தில் ஈடுபட்டனர். மாவட்ட நீதிமன்ற வளாகத்தின் எதிரே நடந்த போராட்டத்திற்கு, வழக்கறிஞர் சங்க தலைவர்கள் சகாதேவன், ராதாகிருஷ்ணன், ராஜகுரு, பன்னீர்செல்வம் ஆகியோர் தலைமையில், 100க்கும் மேற்பட்ட வழக்கறிஞர்கள் பங்கேற்றனர். தொடர்ந்து 10:40 மணிக்கு பிறகு 10 நிமிடம் சாலை மறியல் போராட்டத்திலும் ஈடுபட்டதால், திருச்சி சாலையில் சிறிது நேரம் போக்குவரத்து பாதித்தது. போராட்டம் குறித்து வழக்கறிஞர் சங்கத்தினர் கூறுகையில், 'தமிழகத்தில் உள்ள அனைத்து நீதிமன்றங்களிலும், இ-பைலிங் செய்வதற்கான அடிப்படை கட்டமைப்புகளை மேம்படுத்தாமல், வரும் 1ம் தேதி முதல் இ-பைலிங் நடைமுறையை கட்டாயமாக்குவதாக அறிவிக்கப்பட்டுள்ளது. இதனால், ஒவ்வொரு வழக்கிற்கான அனைத்து ஆவணங்களையும், வழக்கறிஞர்கள், தங்களது நீதிமன்றங்களில் இணையவழியில் பதிவேற்றம் செய்யும் பணி தாமதமாகும். நீதிமன்றங்களில் போதிய அதிவேக இணைய வசதியும், கம்ப்யூட்டர், மின்னணு சாதன வசதிகளும் இல்லாத நிலையில், வழக்கிற்கான நடைமுறை பணிகள் தாமதமாகும். அதற்கான கட்டமைப்பு வசதியை ஏற்படுத்தும் வரை, இந்த அறிவிப்பை, சென்னை உயர் நீதிமன்றம் நிறுத்தி வைத்து, இ-பைலிங் முறையை கட்டாயப்படுத்தாமல், தற்போதுள்ள நடைமுறையே தொடர வேண்டும்' என்றனர்.