நெல் கொள்முதல் நிலையங்களுக்கு நிரந்தர ஷெட் கட்டித்தர கோரிக்கை

விழுப்புரம்: விழுப்புரம் மாவட்ட நேரடி நெல் கொள்முதல் நிலையங்களுக்கு, நிரந்தர ஷெட் கட்டித் தர வேண்டும் என்று வேளாண்துறை ஆணையரிடம், விவசாயிகள் கோரிக்கை மனு அளித்தனர். தமிழ்நாடு சிறு விவசாயிகள் முன்னேற்ற சங்க தலைவர் மணி தலைமையிலான, விழுப்புரம் மாவட்ட விவசாயிகள், தமிழக அரசின் வேளாண் உற்பத்தி ஆணையர் தட்சணாமூர்த்தியை, தலைமைச் செயலகத்தில் உள்ள அவரது அலுவலகத்தில், நேரில் சந்தித்து அளித்த மனு: விழுப்புரம் மாவட்டத்தில் உள்ள அனைத்து அரசு நேரடி நெல் கொள்முதல் நிலையத்திற்கும் அரசு தரப்பில் குடோன் கட்டி தரவேண்டும். குறிப்பாக, மாவட்டத்தில் கடை கோடியில் உள்ள கடவம்பாக்கம் கிராமத்தில் உள்ள அரசு நேரடி நெல் கொள்முதல் நிலையத்திற்கும் குடோன் கட்டி தரவேண்டும். அதற்கு தேவையான அரசு புறம்போக்கு இடம் உள்ளது. இதில், தகுதியான இடத்தை தேர்வு செய்து குடோன் கட்டி தரவேண்டும். இதனால் விவசாயிகளின் நெல் மூட்டைகள் மழையில் நனையாமல், பாதுகாப்பாக இருக்க நடவடிக்கை எடுக்க வேண்டும். இவ்வாறு மனுவில் கூறப்பட்டுள்ளது. ஆரணி மாவட்ட விவசாயிகள் சங்க தலைவர் வெங்கடேசன் உள்ளிட்டோர் உடனிருந்தனர்.