குடியிருப்பை சூழ்ந்த கழிவுநீர் நோய் தாக்கும் அபாயம்: கண்டு கொள்ளாத நகராட்சி

விழுப்புரம்: விழுப்புரம் நகராட்சிக்குட்பட்ட வண்டிமேடு, இந்திராகாந்தி வீதியில் பாதாள சாக்கடை அடைப்பால் வீடுகளை கழிவுநீர் சூழ்ந்துள்ளதால் சுகாதார சீர்கேடு ஏற்பட்டுள்ளது. விழுப்புரம் நகராட்சிக்கு உட்பட்ட வண்டிமேடு, நியூ ஸ்டேட் பேங்க் காலனி, இந்திராகாந்தி வீதியில் நுாற்றுக்கும் மேற்பட்ட குடும்பத்தினர் வசித்து வருகின்றனர். இங்கு, அரசு அலுவலர்கள், ஊழியர்கள், தனியார் நிறுவன அதிகாரிகள் வரை பலரும் உயர் பதவியில் உள்ளவர்கள் உள்ளனர். இந்த பகுதியில், சில தினங்களுக்கு முன் பாதாள சாக்கடையில் அடைப்பு ஏற்பட்டு, கழிவுநீர் வெளியேறியது. இதுகுறித்து அப்பகுதி மக்கள், நகராட்சி கமிஷனரிடம் புகார் தெரிவித்தனர். ஆனால், எந்த நடவடிக்கையும் எடுக்கவில்லை. கழிவுநீர் சூழ்ந்துள்ளதால் மிகவும் சிரமத்தோடு கழிவுநீரை கடந்து செல்லும் நிலை உள்ளது. இதனால், கொசுக்கள் உற்பத்தியாகி தொற்று நோய் பரவும் அபாயம் உள்ளது. நகராட்சி நிர்வாகம், இந்திராகாந்தி வீதியில் உள்ள கழிவுநீர் பிரச்னைக்கு விரைவாக தீர்வு காணவில்லை என்றால், போராட்டத்தில் ஈடுபட முடிவு செய்துள்ளனர்.