காலி பாட்டில் பெறும் திட்டத்தை எதிர்த்து டாஸ்மாக் ஊழியர்கள் போராட்டம்

விழுப்புரம்: விழுப்புரம், கள்ளக்குறிச்சி மாவட்டங்களில், காலி மதுபாட்டில்கள் திரும்பப்பெறும் திட்டத்தை ரத்து செய்யக்கோரி, டாஸ்மாக் ஊழியர்கள் நேற்று மதுக்கடைகளை மூடி வேலை நிறுத்த போராட்டத்தில் ஈடுபட்டனர். காலி மது பாட்டில்களை திரும்ப பெறும் திட்டத்தில், விழுப்புரம், கள்ளக்குறிச்சி மாவட்டங்களில், டாஸ்மாக் கடைகளில் மதுபாட்டில்களை வாங்கிச்செல்வோர், மது அருந்திய பிறகு, காலி மதுபாட்டில்களை அதே கடைகளில் திரும்ப அளிக்கும் திட்டம், நேற்று முதல் தொடங்கும் என, டாஸ்மாக் நிர்வாகத்தால் அறிவிக்கப்பட்டது. கடையில் விற்கும்போதே பீர், பிராந்தி உள்ளிட்ட ஒரு மது பாட்டிலுக்கு, கூடுதலாக 10 ரூபாய் வசூலிக்கப்படும். பிறகு அந்த காலி மது பாட்டிலை அதே கடையில் திரும்ப வழங்கினால், 10 ரூபாய் திரும்ப வழங்கப்படும் என அறிவித்துள்ளனர். இதற்காக மது பாட்டில்களில் ஸ்டிக்கர் ஒட்டப்பட்டு, திரும்ப பெறும் பணி நேற்று தொடங்க இருந்தது. 2 மாவட்டங்களிலும், காலி பாட்டில் பெறும் திட்டத்தை ஏற்க மறுத்த டாஸ்மாக் ஊழியர்கள், நேற்று விழுப்புரம் டாஸ்மாக் தலைமை அலுவலக வாயில் முன் திரண்டு போராட்டத்தில் ஈடுபட்டனர். பகல் 12:00 மணிக்கு கடைகளை திறக்காமல், திரண்டு வந்த தொழிற்சங்கத்தினர், ஊழியர்கள் போராட்டத்தில் ஈடுபட்டனர். சி.ஐ.டி.யு., முத்துக் குமார், இந்திய கம்யூ., சவுரி ராஜன் தலைமையில் கண்டன கோஷம் எழுப்பினர். அப்போது அவர்கள் கூறியதாவது: காலி மதுபாட்டில்கள் திரும்ப பெறும் திட்டம் நல்லது தான். ஆனால், டாஸ்மாக் பணியாளர்கள் மீது, மேலும் பணியை திணிப்பதை ஏற்க முடியாது. ஸ்டிக்கர் ஒட்டுவது, காலி பாட்டிலை வாங்கி கணக்கு கொடுப்பது என பணிச்சுமை அதிகரிக்கும். கடைகளில் மதுபாட்டில்கள் பெறுவதற்கான இடவசதி இல்லை, பாட்டிலுக்கு ரூ.10 வழங்குவதற்கு, தினசரி சில்லரை அதிகளவில் கிடைக்காது போன்ற நடைமுறை சிக்கல்கள் உள்ளது. இதனால், காலி பாட்டில் பெறும் பணியை, ஒப்பந்ததாரர்களிடேமே வழங்க வே ண்டும்' என்றனர். விழுப்புரம், கள்ளக்குறிச்சி மாவட்டத்தில் 190 டாஸ்மாக் கடைகளையும் நேற்று மூடிவிட்டு, போராட்டத்தில் ஈடுபட்டிருந்தனர் .