கவர்னரின் விமர்சனங்களை வரவேற்கிறோம்: இந்திய கம்யூ., மாநில செயலாளர் பேட்டி

விழுப்புரம்: தமிழக கவர்னரின் இடதுசாரி சிந்தனையான விமர்சனங்களை வரவேற்பதாக இந்திய கம்யூ., மாநில செயலாளர் வீரபாண்டியன் தெரிவித்தார். விழுப்புரம் இந்திய கம்யூ., அலுவலகத்தில் நேற்று அவர், நிருபர்களிடம் கூறியதாவது: தமிழக அரசு துறைகளில் காலி பணியிடங்கள் அதிகளவில் உள்ளன. வேலையில்லா இளைஞர்களின் எண்ணிக்கை அதிகரித்து வரும் நிலையில், காலி பணியிடங்களை நிரப்ப வேண்டும். மதுரை, கோவைக்கான மெட்ரோ ரயில் திட்டங்களுக்கு மத்திய அரசு அனுமதி வழங்காதது, தமிழக அரசு மீது தொடுக்கப்பட்ட தாக்குதல். பா.ஜ., ஆளும் மாநிலங்களில் கேட்காமலேயே நிதியை வாரி வழங்குகிறார்கள். ஆனால், இங்கு மக்கள் நலன் சார்ந்த மெட்ரோ ரயில் திட்டத்திற்கு, பொருந்தாத காரணத்தைக்கூறி நிறுத்தி வைப்பது சரியல்ல. டெல்டா மாவட்டங்களில், குறுவைப் பயிர் பாதிப்புக்கு நிவாரண நிதியை மத்திய அரசு வழங்கவில்லை. தமிழக கவர்னரின் விமர்சனங்களை எதிர்கொள்ள தமிழக கட்சிகள் தயாராக உள்ளன. சமத்துவம் தொடர்பாக, அவரின் இடதுசாரி சிந்தனையிலான விமர்சனங்களை வரவேற்கிறோம். ஆனால், அரசு பொறுப்பில் இருக்கும் அவர், அரசியல் கட்சிகள் மீது தாக்குதல் தொடுப்பதும் சரியல்ல. புதிய கட்சி நடத்தும் கூட்டத்திற்கு அதிக கூட்டம் வருவதும், சிலர் இணைவதும் வெற்றியை தீர்மானிக்காது. விஜய் தனித்து வந்தாலும், ஆயிரம் பேரை அழைத்து வந்தாலும், பா.ஜ., - அ.தி.மு.க., என ஒரே அணியில் வந்தாலும், அவர்கள் தோற்கடிக்கப்படுவர். ஆளும் தி.மு.க., கூட்டணியில் இருந்தாலும், அரசு ஊழியர்கள், தொழிலாளர்கள் கோரிக்கையை தொடர்ந்து வலியுறுத்துகிறோம். இவ்வாறு வீரபாண்டியன் கூறினார். விழுப்புரம் மாவட்ட செயலாளர் சவுரிராஜன், சரவணன், கலியமூர்த்தி உள்ளிட்ட நிர்வாகிகள் உடனிருந்தனர்.