மாவட்ட அரசு விளையாட்டரங்க வளாகம் மேம்படுத்தப்படுமா? துணை முதல்வர் கவனம் செலுத்த கோரிக்கை

விழுப்புரம்: விழுப்புரத்தில் உள்ள விளையாட்டு மைதானத்தில் போதிய பராமரிப்பு இன்றி, விளையாட்டு வீரர்கள் சிரமப்படுகின்றனர். விழுப்புரம் அரசு கலைக் கல்லுாரி வளாகத்தில், மாவட்ட விளையாட்டு மைதானம் அமைந்துள்ளது. போதிய பராமரிப்பின்றி, ஆங்காங்கே மழைநீர் தேங்கி, சுகாதாரமற்ற நிலையில் உள்ளது. கடந்த ஜூன் மாதம், விழுப்புரம் மாவட்ட அரசு விளையாட்டு அரங்கினை, கலெக்டர் ஷேக் அப்துல் ரஹ்மான் பார்வையிட்டார். பின், கடந்த ஆகஸ்ட் மாதம் நடந்த சுதந்திர தின நிகழ்ச்சிகளை, இங்கு நடத்திட கலெக்டர் உத்தரவிட்டார். இதையொட்டி, விளையாட்டு மைதானம், ஓரளவு சீரமைக்கப்பட்டது. மாவட்ட அரசு விளையாட்டு மைதானத்தை சீரமைப்பதற்கு, தமிழ்நாடு விளையாட்டு ஆணையம் சார்பில், கடந்த 2024-25ம் ஆண்டு அறிக்கை தயாரிக்கப்பட்டது. அதன்படி, விளையாட்டு மைதான வளாகத்தில் நிர்வாக அலுவலகம் மற்றும் மாவட்ட அலுவலர் தங்கும் விடுதி கட்டடம் அமைப்பது. விளையாட்டு விடுதியின் தரை தளத்தில் சமையலறையை விரிவாக்கம் செய்து, உணவு கூடத்தை மேம்படுத்துவது. வளாகத்தைச் சுற்றியுள்ள சேதமடைந்த சுற்றுச் சுவரை செப்பனிடுவது, நுழைவு வளைவு அமைக்கவும் திட்டமிடப்பட்டது. மேலும், மைதானத்தின் முன்புறம் வடிகால் வசதியை மேம்படுத்தி, எருமணந்தாங்கல் வரை மழைநீர் வாய்க்காலை கொண்டு செல்வது. விடுதி கட்டடத்தை பழுது நீக்கி, பாதுகாப்பான குடிநீர் வசதி மற்றும் சுகாதார பணிகளை மேற்கொள்ள திட்டமிடப்பட்டது. இதற்காக 12 கோடி ரூபாய் செலவில் தயாரிக்கப்பட்ட திட்ட அறிக்கை, கிடப்பில் போடப்பட்டதால் மைதானம் பொலிவிழந்து பரிதாப நிலையில் உள்ளது. இப்பிரச்னையில், துணை முதல்வரும், விளையாட்டு மேம்பாட்டுத்துறை அமைச்சருமான உதயநிதி, தனி கவனம் செலுத்தி உரிய நடவடிக்கை எடுக்க வேண்டும் என மாவட்ட மக்கள் எதிர்பார்க்கின்றனர்.

குழந்தைகள் தின பரிசு

விழுப்புரம் முத்தோப்பு பகுதியில் பல ஆண்டுகளாக உள்ள சிறுவர் விளையாட்டு பொது பூங்காவை, தனியார் உரிமை கோரி வழக்கு தொடரப்பட்டது. பொதுமக்களின் முழு முயற்சியின் பேரில், இந்த வழக்கில், சர்வதேச குழந்தைகள் தினத்தன்று கடந்த 14ம் தேதி தள்ளுபடி செய்து, ஒரு வரலாற்று தீர்ப்பு கிடைத்துள்ளது. இது எதிர்காலத்தில் பொது இடங்களைக் காக்கும் போராட்டங்களுக்கு முன்மாதிரியாக அமைந்துள்ளது. மேலும், பொதுப்பூங்கா உள்ளிட்ட விளையாட்டு மைதானங்களை பாதுகாப்பதற்கு அரசு அதிகாரிகள் நடவடிக்கை எடுக்க வேண்டும். -பத்மாவதி 8வது வார்டு கவுன்சிலர்

பல மாவட்டங்கள் வளர்ச்சி

தமிழகத்தில், சில ஆண்டுகளுக்கு முன் புதிதாக துவக்கப்பட்ட கள்ளக்குறிச்சி, ராணிப்பேட்டை, திருப்பத்துார் உள்ளிட்ட மாவட்டங்களில், விளையாட்டுத்துறை சிறப்பான வளர்ச்சியை அடைந்துள்ளது. துணை முதல்வர் உத்தரவின்பேரில், இந்த மாவட்டங்களில் தலா 15 கோடி ரூபாய் மதிப்பீட்டில் நவீன வசதிகளுடன் விளையாட்டு மைதானங்கள் தயாராகி வருகிறது. விழுப்புரத்தில் கடந்த 30 ஆண்டுகளுக்கு முன் துவக்கப்பட்ட விளையாட்டு மைதானத்தை சீரமைப்பதற்கு, உரிய நடவடிக்கை எடுக்கவில்லை. மைதானத்தை சீரமைப்பதற்கு, தமிழ்நாடு விளையாட்டு மேம்பாட்டு ஆணையம் முன் வர வேண்டும். -குமார், இந்திய குடியரசு கட்சி, இருவேல்பட்டு.

குட்டையை அகற்றிட கோரிக்கை

மாவட்ட விளையாட்டு . மைதானத்திற்கு ஒதுக்கப்பட்ட 14 ஏக்கர் இடத்தை முழுமையாக அளவீடு செய்து, சீரமைக்கப்பட வேண்டும். ஆரம்பத்தில் மழைநீர் தேங்கிய அப்பகுதி, காலப்போக்கில் கழிவுநீர் குட்டையாக மாறிவிட்டது. இப்பகுதியில் மழைநீர் மற்றும் கழிவுநீர் வெளியேற தனித்தனி வாய்க்கால் அமைத்து, செயற்கையான குட்டையை முழுமையாக அகற்றிட வேண்டும். இதற்காக மாவட்ட நிர்வாகம் உரிய நடவடிக்கைகள் மேற்கொள்ள வேண்டும். -மனோ, வழக்கறிஞர், தே.மு.தி.க., தொழிற்சங்கம்

நவீன விளையாட்டு விடுதி

விழுப்புரம் அரசு கல்லுாரி வளாகத்தில் உள்ள மாவட்ட விளையாட்டு மைதானம் மழை நீர் தேங்கி, சுகாதாரமற்ற நிலையில் உள்ளது. இந்த மைதானத்தின் முன்புறம் சுற்றுச் சுவரையொட்டி செல்லும் வடிகால் வாய்க்காலில், கழிவுநீர் தேங்கி நிற்கிறது. எந்த நேரமும் சுவர் இடிந்து விழக்கூடிய அபாயம் உள்ளது. இதனை சீரமைக்க, விளையாட்டு மேம்பாட்டு ஆணையம் நடவடிக்கை எடுக்க வேண்டும். மேலும், விளையாட்டு வீரர்கள் தங்குவதற்கு அடிப்படை வசதிகளுடன் கூடிய புதிய விடுதி கட்டடம், போட்டிகளுக்கு வரும் விளையாட்டு வீரர்கள் ஓய்வு எடுப்பதற்கான அறையையும் அமைத்திட நடவடிக்கை எடுக்க வேண்டும். - ராதிகா, வழக்கறிஞர், 9வது வார்டு கவுன்சிலர்.