விருதுநகரில் முக்கிய ரோடுகள் தோண்டி போடப்பட்டுள்ளதால் சிரமத்தில் மக்கள் நகராட்சி கூட்டத்தில் கவுன்சிலர்கள் புகார்

விருதுநகர்: நகரின் முக்கிய ரோடுகள் அனைத்தும் தோண்டிப் போடப்பட்டுள்ளது. இதனால் மக்கள் மிகவும் சிரமப்படுகின்றனர். பணிகளை துரிதப்படுத்த வேண்டும். என நகராட்சிக் கூட்டத்தில் கவுன்சிலர்கள் புகார் கூறினர். விருதுநகர் நகராட்சியின் சாதாரண, அவசரக் கூட்டம் நகராட்சித் தலைவர் மாதவன் தலைமையில் நடந்தது. கமிஷனர் விஜயகுமார், பொறியாளர் எட்வின்பிரைட்ஜோஸ் முன்னிலை வகித்தனர். கூட்டத்தில் நடந்த விவாதம் காங். கவுன்சிலர் ராஜ்குமார்: தனது வார்டில் பல ஆண்டுகளாக பாதாள சாக்கடை பிரச்சனை தீர்க்கப்படவில்லை. எனவே அதை சரி செய்ய வேண்டும் என தரையில் அமர்ந்து போராட்டத்தில் ஈடுபட்டார். இதையடுத்து நேரில் ஆய்வு செய்து நடவடிக்கை எடுக்கப்படும் என கமிஷனர் உறுதி அளித்தார். வெங்கடேஷ், அ.தி.மு.க.,: நகரின் முக்கிய ரோடுகள் அனைத்தும் தோண்டிப் போடப்பட்டுள்ளது. இதனால் மக்கள் மிகவும் சிரமப்படுகின்றனர். பணிகளை துரிதப்படுத்த வேண்டும். கலையரசன், தி.மு.க.,: குடிநீர் குழாய்க்காக தோண்டப்பட்ட ரோடுகளை சீரமைக்கவில்லை. மாதவன், தலைவர்: ஏற்கனவே ஒப்பந்ததாரர் மீது நடவடிக்கை எடுக்க வேண்டுமென கடிதம் அனுப்பியுள்ளோம். ஆறுமுகம், தி.மு.க.,: கணக்கீட்டுப் படிவங்கள் பற்றி மக்களுக்குச் சரிவர தெரிவிக்கவில்லை. ஓட்டுச்சாவடி நிலை அலுவலர்கள் மக்களுக்கு படிவத்தை நிரப்ப உதவ வேண்டும். ஜெயக்குமார், மார்க்சிஸ்ட்: குறைவான கால அவகாசம் உள்ள நிலையில் டிச. 4க்குள் எப்படி படிவங்களை எப்படி பதிவேற்றம் செய்ய முடியும். எனவே படிவங்களை வாக்காளர்களிடம் பெற்று பதிவேற்றம் செய்ய காலநீட்டிப்பு செய்ய வேண்டும். விஜயக்குமார், கமிஷனர்: 60ஆயிரம் வாக்காளர்களில் 25 ஆயிரம் கணக்கீட்டுப் படிவங்கள் பதிவேற்றம் செய்யப்பட்டுள்ளது. ஏதேனும் குறைகள் இருந்தால் சம்மந்தப்பட்ட மேற்பார்வை அலுவலர்களிடம் புகார் தெரிவிக்கலாம். இவ்வாறு விவாதம் நடந்தது.