காரியாபட்டியில் பழுதான மினரல் பிளான்ட்

காரியாபட்டி: காரியாபட்டியில் சில மாதங்களுக்கு முன் மராமத்து செய்த மினரல் பிளான்ட் பயன்பாடு இன்றி உள்ளது. குடிநீர் பிரச்னை இருப்பதால் பயன்பாட்டிற்கு கொண்டு வர மக்கள் எதிர்பார்க்கின்றனர். காரியாபட்டி 2வது வார்டில் குடிநீர் சப்ளை செய்ய ரூ. பல லட்சம் செலவில் 10 ஆண்டுகளுக்கு முன் மினரல் பிளான்ட் அமைக்கப்பட்டது. ரூ. 5 காயின் செலுத்தி, ஒரு குடம் குடிநீர் பிடித்து சென்றனர். எப்போதும் குடிநீர் கிடைத்ததால் பிரச்னை இன்றி இருந்தது. இந்நிலையில் பிளான்ட் பழுது ஏற்பட்டு 3 ஆண்டுகளுக்கு மேல் கிடப்பில் போடப்பட்டது. பைப்புகள், மோட்டார் அனைத்தும் துருப்பிடித்து பயன்பாடு இன்றி போனது. இதனை சீரமைத்து மக்கள் பயன்பாட்டிற்கு கொண்டு வர வேண்டுமென அப்பகுதி மக்கள் கோரிக்கை விடுத்தனர். இதையடுத்து சில மாதங்களுக்கு முன் ரூ. பல லட்சம் செலவு செய்து மராமத்து செய்யப்பட்டது. 1 மாதம் மட்டுமே குடிநீர் சப்ளையானது. மீண்டும் பழுதாகி கிடப்பில் உள்ளது. குடிநீரை குடம் ரூ. 10க்கு விலை கொடுத்து வாங்க வேண்டிய சூழ்நிலை இருந்து வருகிறது. அதுவும் எப்போது குடிநீர் வாகனம் வருமோ என எதிர்பார்த்து காத்திருக்க வேண்டிய நிலை உள்ளதால், பெண்கள் வேலைகளுக்கு செல்ல முடியாமல் தவித்து வருகின்றனர். மீண்டும் அப்பகுதியில் குடிநீர் பிரச்னை இருப்பதால் மினரல் பிளான்டை சீரமைத்து பயன்பாட்டிற்கு கொண்டு வர நடவடிக்கை எடுக்க வேண்டும் என அப்பகுதி மக்கள் எதிர்பார்க்கின்றனர்.