கின்னஸ் உலக சாதனைக்காக 12 கிராம் தங்கத்தில் எலக்ட்ரிக் கார் ஸ்ரீவி., நகைக்கடை உரிமையாளர் வடிவமைப்பு

ஸ்ரீவில்லிபுத்துார்: விருதுநகர் மாவட்டம் ஸ்ரீவில்லிபுத்துார் நகைக்கடை உரிமையாளர் மணிகண்டன் கின்னஸ் உலக சாதனைக்காக 12 கிராம் தங்கத்தில் உலகிலேயே மிகச் சிறிய எலக்ட்ரிக் காரை வடிவமைத்துள்ளார். ஸ்ரீவில்லிபுத்துாரைச் சேர்ந்தவர் மணிகண்டன் 45. 5ம் வகுப்பு படித்துள்ள இவர் நகைக்கடை நடத்தி வருகிறார். இவர் 2002ல் 163 கிராம் வெள்ளி பேன், 2004ல் 110 கிராமில் வெள்ளி பைக் வடிவமைத்து பல்வேறு சாதனை புத்தகங்களில் இடம் பெற்ற நிலையில் 2007 ல் 24 மி.மீட்டர் செஸ் போர்டு தயாரித்து கின்னஸ் சாதனையில் இடம் பெற்றார். தீவிர கமல் ரசிகரான இவர் 2021ல் 260 மில்லி தங்கத்தில் டார்ச் லைட் தயார் செய்து கமலஹாசனுக்கு வழங்கி உள்ளார். இவரின் சாதனைகளை முன்னாள் முதல்வர் கருணாநிதி, முன்னாள் கவர்னர் பர்னாலா, கர்நாடக முன்னாள் முதல்வர் வீரப்ப மொய்லி பாராட்டியுள்ளனர். முன்னாள் ஜனாதிபதி அப்துல் கலாம் நேரில் வர அழைப்பு விடுத்த நிலையில், அவரை சந்திக்க முடியாததால் வாழ்த்துக்களை பெற்றுள்ளார். தற்போது 12 கிராம் தங்கத்தில் ஒரு அங்குல நீளம், அரை அங்குல அகலம், உயரம் கொண்ட ஒரு எலக்ட்ரிக் காரை வடிவமைத்துள்ளார். இதனை ஒருமுறை சார்ஜ் செய்தால் ஒரு மணி நேரம் வரை இயங்கும். அப்போது ஆடியோ சிஸ்டமும், முகப்பு விளக்குகளும் செயல்படும். மணிகண்டன் கூறியதாவது, வித்தியாசமாக ஏதாவது செய்து கின்னஸ் சாதனை படைக்க வேண்டும் என்ற முயற்சியில் ஈடுபட்டு வருகிறேன். அதன்படி கின்னஸ் மட்டுமன்றி பல்வேறு சாதனை புத்தகங்களிலும் என்னுடைய வடிவமைப்புகள் இடம்பெற்றுள்ளன. தற்போது அமெரிக்காவைச் சேர்ந்த எலான் மாஸ்க்கின், டெஸ்லா காரை போன்று, 12 கிராம் தங்கத்தில் கின்னஸ் உலக சாதனைக்காக இந்த காரினை உருவாக்கி உள்ளேன், என்றார்.