ஓட்டலில் கைதி தப்பி ஓட்டம் இரு போலீசார் சஸ்பெண்ட்

ஸ்ரீவில்லிபுத்தூர்: விருதுநகர் மாவட்டம் ஸ்ரீவில்லிபுத்தூர் அருகே புகையிலைப்பொருட்கள் கைப்பற்றிய வழக்கில் கைதான கோட்டையூர் செந்தமிழ் செல்வன் 27 என்பவரை விருதுநகர் சிறைக்கு அழைத்து செல்லும் வழியில் தப்பி ஓடினார். அவரை அழைத்துச் சென்ற போலீஸ்காரர்கள் இருவர் சஸ்பெண்ட் செய்யப்பட்டனர். வத்திராயிருப்பு கோட்டையூரை சேர்ந்தவர் செந்தமிழ் செல்வன். நேற்று முன்தினம் காலை இவரது வீட்டின் அருகில் விற்பனைக்காக வைத்திருந்த 1.3 கிலோ புகையிலைப் பொருட்களை போலீசார் கைப்பற்றி அவரை கைது செய்தனர். வத்திராயிருப்பு நீதிமன்றத்தில் ஆஜர் படுத்தி விட்டு மாலை விருதுநகர் சிறைக்கு, தலைமை காவலர் மதன சாமி, போலீஸ்காரர் லிங்கராஜ் ஆகியோர் அவரை அழைத்துச் சென்றனர். வழியில் அழகாபுரியில் ஒரு ஓட்டலில் சாப்பிட கை கழுவ செல்லும்போது செந்தமிழ்ச்செல்வன் தப்பி ஓடினார். நத்தம்பட்டி போலீசார் வழக்கு பதிவு செய்துள்ளனர். இந்நிலையில் போலீசார் இருவரையும் சஸ்பெண்ட் செய்து விருதுநகர் எஸ். பி. கண்ணன் உத்தரவிட்டுள்ளார்.