சென்னை: வங்கக்கடலில் இலங்கை அருகே உருவான 'டிட்வா' புயல், சென்னை மற்றும் வட மாவட்டங்களை நோக்கி நகர்கிறது. இதனால், செங்கல்பட்டு உட்பட நான்கு கடலோர மாவட்டங்களில் இன்று அதி கனமழைக்கான 'ரெட் அலெர்ட்' எச்சரிக்கை விடுக்கப்பட்டுள்ளது. https://static.vidgyor.com/player/vod/html/indexv2.html?videoId=kvibhre1&cmsAccountId=6253e2117f4d5c0009c78ed4&masterProfileId=64f573f4fbdd700008119b10&pip=1&autoplay=0இது குறித்து, வானிலை ஆய்வு மைய இயக்குநர் பா.செந்தாமரை கண்ணன் கூறியதாவது: நேற்று காலை வரையிலான 24 மணி நேரத்தில், ராமநாதபுரத்தில் 3 செ.மீ., மழை பெய்துள்ளது. இதற்கு அடுத்தபடியாக, ராமநாதபுரம் மாவட்டம் தங்கச்சிமடம், பாம்பன் பகுதிகளில் தலா, 2 செ.மீ., மழை பதிவாகியுள்ளது. வங்கக்கடலில் நேற்று முன்தினம் உருவான டிட்வா புயல், நேற்று காலை நிலவரப்படி இலங்கை கடலோர பகுதிகள், அதை ஒட்டிய தென்மேற்கு வங்கக்கடல் பகுதியில் நிலவியது. சென்னைக்கு தெற்கே 510 கி.மீ., தொலைவிலும், புதுச்சேரிக்கு தெற்கு, தென்கிழக்கே 430 கி.மீ., தொலைவிலும் நிலை கொண்டுள்ளது. இது, வடக்கு மற்றும் வடமேற்கு திசையில், சென்னை மற்றும் தமிழக வட கடலோர மாவட்டங்களை நோக்கி நகர்கிறது. இந்த புயல், நாளை அதிகாலையில் வட மாவட்டங்கள், புதுச்சேரி மற்றும் தெற்கு ஆந்திர கடலோரப் பகுதிகளில் நிலவக்கூடும். தமிழகத்தின் வட மாவட்டங்களில் பெரும்பாலான இடங்கள், தென் மாவட்டங்களில் ஒரு சில இடங்களில் இன்று இடி, மின்னலுடன் மிதமான மழை பெய்ய வாய்ப்புள்ளது. டெல்டா மற்றும் அதை ஒட்டிய மாவட்டங்களில் இன்றும், நாளையும் மணிக்கு 90 கி.மீ., வேகத்தில் பலத்த காற்று வீசக்கூடும். செங்கல்பட்டு, விழுப்புரம், கடலுார், மயிலாடுதுறை மாவட்டங்கள் மற்றும் புதுச்சேரியில் இன்று அதிகனமழை பெய்ய வாய்ப்புள்ளது. இதற்கான ரெட் அலெர்ட் விடுக்கப்பட்டுள்ளது. புதுக்கோட்டை, தஞ்சாவூர், திருவாரூர், நாகப்பட்டினம், அரியலுார், பெரம்பலுார், திருச்சி, சேலம், கள்ளக்குறிச்சி, திருவண்ணாமலை, காஞ்சிபுரம், சென்னை, திருவள்ளூர், ராணிப்பேட்டை மாவட்டங்கள், காரைக்காலில் இன்று மிக கனமழை பெய்ய வாய்ப்புள்ளது. இதற்கான ஆரஞ்ச் அலெர்ட் விடுக்கப்பட்டுள்ளது. வேலுார், திருப்பத்துார், கிருஷ்ணகிரி, தர்மபுரி, நாமக்கல், கரூர் மாவட்டங்களில் இன்று கனமழை பெய்ய வாய்ப்புள்ளது. நாளை திருவள்ளூர், ராணிப்பேட்டை மாவட்டங்களில் நாளை அதிகனமழை பெய்யக்கூடும். இதற்கான ரெட் அலெர்ட் விடுக்கப்பட்டுள்ளது. சென்னை, காஞ்சிபுரம், வேலுார், செங்கல்பட்டு, திருப்பத்துார், கிருஷ்ணகிரி, தர்மபுரி மாவட்டங்களில் நாளை மிக கனமழை பெய்ய வாய்ப்புள்ளது. இதற்கான ஆரஞ்ச் அலெர்ட் விடுக்கப்பட்டுள்ளது. சேலம், கள்ளக்குறிச்சி, திருவண்ணாமலை, விழுப்புரம் மாவட்டங்கள், புதுச்சேரியில் நாளை கனமழை பெய்ய வாய்ப்புள்ளது. சென்னை மற்றும் புறநகர் பகுதிகளில் இன்று வானம் மேகமூட்டமாக காணப்படும்; ஒரு சில இடங்களில் மிக கனமழை பெய்ய வாய்ப்புள்ளது. தென்மேற்கு வங்கக்கடல், மன்னார் வளைகுடா, குமரிக்கடல் பகுதிகளில் இன்றும், நாளையும், மணிக்கு 70 முதல் 80 கி.மீ., வேகத்திலும், இடையிடையே 90 கி.மீ., வேகத்திலும் சூறாவளி காற்று வீசக்கூடும். எனவே, மீனவர்கள் இப்பகுதிகளுக்கு செல்ல வேண்டாம். இவ்வாறு அவர் கூறினார்.
'டிட்வா' நகரும் வேகம் குறைந்தது
வங்கக்கடலில் உருவாகியுள்ள டிட்வா புயல் தொடர்ந்து வடக்கு, வடமேற்கு திசையில் நகர்ந்து வருகிறது. நேற்று முன்தினம் இது, மணிக்கு 15 கி.மீ., வேகத்தில் நகர்ந்து வந்தது. அதன்பின், இலங்கை நிலப்பரப்பில் நுழைந்ததும், அதன் வேகம் படிப்படியாக குறைய துவங்கியது. நேற்று காலை நிலவரப்படி மணிக்கு 5 கி.மீ., வேகத்தில் நகர்ந்த புயல், மாலையில் மணிக்கு 3 கி.மீ., வேகத்தில் வடக்கு நோக்கி நகர்ந்து வந்தது. இலங்கையின் நிலப்பரப்பில் அதீத மழையை கொடுத்து வரும் டிட்வா புயல், நிலப்பரப்பில் இருந்து கடல் பரப்புக்கு வருவதில் தாமதம் ஏற்பட்டுள்ளது. கடல் பரப்புக்கு வந்த பின் தான், இதன் நகர்வு குறித்தும், அது செல்லும் திசை குறித்தும் கூடுதல் விபரங்கள் கிடைக்கும் என, வானிலை மைய அதிகாரிகள் தெரிவித்தனர்.