காலி பணியிடங்களை நிரப்புங்கள் மின் வாரிய சங்கங்கள் வலியுறுத்தல்

சென்னை:மின்வாரியத்தில் காலிப் பணி யிடங்களை நிரப்ப தொழிற்சங்கங்கள் வலியுறுத்தி உள்ளன. மின் வாரியத்தில், நான்கு ஆண்டுகளுக்கு ஒரு முறை ஊதிய உயர்வு வழங்கப்படுகிறது. அதன்படி, 2023 டிச., முதல் புதிய ஊதிய உயர்வு வழங்கப்பட வேண்டும். இதை நிர்ணயம் செய்ய, மின் பகிர்மான கழக இயக்குநர் மாஸ்கர்னஸ், மின் வாரிய நிதிப்பிரிவு இயக்குநர் மலர்விழி ஆகியோர் நேற்று, 19 தொழிற்சங்கங்களின் நிர்வாகிகளுடன் பேச்சு நடத்தினர். தமிழக மின் வாரிய பணியாளர் கூட்டமைப்பு பொதுச்செயலர் சேக்கிழார் கூறியதாவது: மின் வாரியத்தில் காலிபணியிடங்களை நிரப்ப நடவடிக்கை எடுக்குமாறு வலியுறுத்தப்பட்டது. இதற்கு அரசிடம் கேட்பதாக கூறுவதற்கு பதில், மின் வாரியமே தன் அதிகாரத்தை பயன்படுத்தி, ஆட்களை தேர்வு செய்யுமாறு தெரிவிக்கப்பட்டது. ஊதிய உயர்வு குறித்து, ஒவ்வொரு சங்கத்திடமும் தனித்தனியே பேச்சு நடத்த வலியுறுத்தப்பட்டது. இவ்வாறு அவர் கூறினார். மின் வாரிய தொழிலாளர், பொறியாளர் ஐக்கிய சங்க பொதுச் செயலர் சுப்ரமணியன் கூறுகையில், ''காலியிடங்களை நிரப்ப நடவடிக்கை எடுக்குமாறு, கூட்டத்தில் வலியுறுத்தி உள்ளோம்,'' என்றார்.