சபாநாயகருக்கான மாண்பை இழந்த அப்பாவு: பா.ஜ.,

சென்னை: 'சபாநாயகர் பொறுப்புக்குரிய மாண்பை அப்பாவு இழந்து விட்டார்' என, தமிழக பா.ஜ., தலைமை செய்தி தொடர்பாளர் நாராயணன் திருப்பதி தெரிவித்துள்ளார்.

அவரது அறிக்கை:

சபாநாயகர் பொறுப்புக்குரிய மரியாதையை, மாண்பை, அப்பாவு இழந்து விட்டார். தேர்தல் நெருங்குவதால், தி.மு.க.,வுக்கு விசுவாசமாக இருந்தால்தான், மீண்டும் எம்.எல்.ஏ.,வாக முடியும் என்ற ஆசையில், கவர்னரை பயங்கரவாதி என சொல்லி புளகாங்கிதம் அடைகிறார். கோவையில் கடந்த 2022ல் நடந்த குண்டு வெடிப்பு; ஐ.எஸ்., பயங்கர வாத இயக்கத்தில் இளைஞர்களை சேர்ப்பதற்கான பணியில் ஈடுபட்டது என, கடந்த ஐந்து ஆண்டுகளில், தமிழகத்தில் தேசிய புலனாய்வு அமைப்பான என்.ஐ.ஏ.,வால், 28 பேர் கைது செய்யப்பட்டுள்ளனர். இந்தியாவிலேயே பயங்கரவாதம் தொடர்பாக, அதிகமானோர் கைது செய்யப்பட்டது, தமிழகத்தில் தான். அதே போல், சட்டம் - ஒழுங்கு சீர்கேடு உச்சக்கட்டத்தில் உள்ளது. இது தெரிந்தும், தமிழகத்தில் பயங்கரவாதம் இல்லை, சட்டம் - ஒழுங்கு சீராக உள்ளது என, உண்மைக்கு புறம்பாக அப்பாவு பேசியிருக்கிறார். சட்டம் - ஒழுங்கை பேணி காக்க தெரியாத; பயங்கரவாதத்தை ஒடுக்க முடியாத தி.மு.க., அரசுக்கு சபாநாயகர் அப்பாவு முட்டு கொடுக்கிறார். இவ்வாறு அதில் கூறப்பட்டுள்ளது.