ராமேஸ்வரத்தில் கனமழை 200 வீடுகளை சூழ்ந்த வெள்ளம்

: 'டிட்வா' புயலால், நேற்று முன்தினம் ராமேஸ்வரம் பகுதியில் மணிக்கு 68 கி.மீ., வேகத்தில் சூறாவளி வீசி, கடலில் கொந்தளிப்பு ஏற்பட்டது. ராமேஸ்வரத்திற்கு ரயில் சேவை முற்றிலும் ரத்தானது. இரண்டாம் நாளான நேற்றும், 52 கி.மீ., வேகத்தில் சூறாவளி வீசியதால் ராமேஸ்வரம், பாம்பன் கடலில் கொந்தளிப்பு ஏற்பட்டது. ராமேஸ்வரம் செல்லும் அனைத்து ரயில்களும் ராமநாதபுரம், மண்டபம் ரயில்வே ஸ்டேஷன்களுடன் நிறுத்தப்பட்டன. நேற்று மாலை காற்றின் வேகம் குறைந்ததால், ராமேஸ்வரத்தில் இருந்து சில ரயில்கள் இயக்கப்பட்டன. தொடர் மழையால், ராமேஸ்வரம் புது ரோடு நடராஜபுரம், காந்தி நகர், அண்ணா நகர், இந்திரா நகர், தங்கச்சிமடம் அய்யன்தோப்பு, பாம்பன் தரவைதோப்பு, சின்னப்பாலம், மண்டபம் எருமைதரவை ஆகிய பகுதியில், 200க்கும் மேலான வீடுகளை மழைநீர் சூழ்ந்தது. இரண்டாம் நாளாக தனுஷ்கோடிக்கு வர, சுற்றுலா பயணியருக்கு போலீசார் தடை விதித்தனர். மழையால் இயல்பு வாழ்க்கை பாதிக்கப் பட்டது. விமானங்கள் ரத்து மோசமான வானிலை காரணமாக, திருச்சியில் இருந்து சென்னைக்கு செல்லும் ஆறு விமானங்களும், பெங்களூரு செல்லும் மூன்று விமானங்களும், கொழும்பு செல்லும் ஒரு விமானமும் நேற்று ரத்து செய்யப்பட்டன. மதுரையில், 15 விமான சேவைகள் பாதிக்கப் பட்டன. நாகையில் பாதிப்பு நாகை மாவட்டத்தில் இரு நாட்களாக பெய்து வரும் கனமழையால் நாகை, கீழ்வேளூர், கீழையூர், வேதாரண்யம், தலைஞாயிறு, திருமருகல் ஒன்றியங்களில், 80,000 ஏக்கரில் நெற்பயிர்கள் தண்ணீரில் மூழ்கியுள்ளன. வேதாரண்யம், கோடியக்கரையில் கடலையொட்டிய பகுதிகள் மழை நீரால் சூழப்பட்டு, குடியிருப்புகளில் மழை நீர் உட்புகுந்ததால் மக்கள் அவதிக்குள்ளாகியுள்ளனர். சாலைகளில் ஆறுகள் போல் மழை நீர் பெருக் கெடுத்து ஓடுகிறது. கோடியக்கரை, அகஸ்தியன்பள்ளியில் 5,000 ஏக்கர் உப்பளங்கள் மழைநீரில் மூழ்கி வெள்ளக்காடாய் காட்சியளிக்கின்றன. - நமது நிருபர் குழு -