விஜயை முதல்வராக்க உயிருள்ளவரை பாடுபடுவேன் கோவையில் செங்கோட்டையன் பேட்டி

கோவை: ''விஜயை முதல்வராக்க, உயிர் மூச்சு உள்ளவரை பாடுபடுவேன்,'' எனறு கோவையில் செங்கோட்டையன் கூறினார். த.வெ.க.,வில் இணைந்து, மேற்கு மண்டல அமைப்பு செயலாளராக பொறுப்பேற்றுக் கொண்ட பின், கோவை வந்த செங்கோட்டையனுக்கு, கட்சித் தொண்டர்கள் விமான நிலையத்தில் உற்சாக வரவேற்பு அளித்தனர். விமான நிலையத்தில் அவரது பேட்டி: த.வெ.க.,வின் தலைவர் விஜய், நாளைய தமிழகத்தின் முதல்வர் ஆவார். நேர்மையான, புனிதமான ஆட்சியை தர புறப்பட்டிருக்கிறார். ஆண்டிற்கு 500 கோடி ரூபாய் வருவாய் கிடைத்தாலும், அதை துாக்கி எறிந்து விட்டு மக்களின் சேவைக்காக துணிந்து இந்த இயக்கத்தை உருவாக்கி இருக்கிறார். அதில் நான் இடம்பெற்று இருக்கிறேன். என் உயிர் மூச்சு உள்ளவரை அவரை முதல்வராக்க பாடுபடுவேன். முதல் தலைமுறையில் எம்.ஜி.ஆர்., வழியில் நின்று பணியாற்றினோம். இரண்டாவது தலைமுறையில் ஜெ., வழியில் பணியாற்றினோம். மூன்றாவது தலைமுறையாக, விஜயை ஆட்சி கட்டிலில் அமர உறுதுணையாக இருப்போம்.இவ்வாறு, அவர்கூறினார். விமானம் தாமதம் சென்னையிலிருந்து புறப்பட்ட இண்டிகோ விமானம், மதியம் 1.00 மணிக்கு வந்து சேர வேண்டும். இதில் செங்கோட்டையன் வருவார் என்ற ஆவலோடு த.வெ.க தொண்டர்கள் பெருமளவில் கூடியிருந்தனர். ஆனால் தொழில்நுட்ப கோளாறு காரணமாக சென்னையில் இருந்து புறப்பட்ட விமானம் பெங்களூருக்கு திரும்பியது. அங்கு தரையிறங்கி விமானத்தில் ஏற்பட்ட கோளாறு சரி செய்யப்பட்ட பின் கோவை வந்தடைந்தது. இதனால் செங்கோட்டையன் வர மாலை 4.30 மணி ஆனது. இருப்பினும் விமான நிலையத்தில் அவருக்கு, மேளதாளங்களுடன், தொண்டர்கள் உற்சாகமாக வரவேற்றனர்.