சொந்த பயன்பாட்டு வாகன பதிவுக்கு இனி ஆர்.டி.ஓ., ஆபீஸ் வர தேவையில்லை: புதிய விதிமுறை நாளை முதல் அமல்

சென்னை: சொந்த பயன்பாட்டுக்காக வாங்கப்படும் புதிய வாகனங்களை பதிவு செய்ய, ஆர்.டி.ஓ., எனும் வட்டார போக்குவரத்து அலுவலகத்திற்கு இனி வாகனங்களை கொண்டுவர வேண்டிய அவசியம் இல்லை. இந்த புதிய நடைமுறை, நாளை முதல் அமலாகிறது. தமிழகத்தில் மொத்தம் 150 வட்டார போக்குவரத்து அலுவலகங்கள், யூனிட் அலுவலகங்கள் இயங்கி வருகின்றன. டூ - வீலர்கள், கார்கள், கனரக வாகனங்கள் உட்பட தினமும், 8,000 வாகனங்கள் வரை புதிதாக பதிவு செய்யப்படுகின்றன. இவற்றில், சொந்த பயன்பாட்டிற்கான வாகனங்கள் மட்டுமே, 3,000 முதல் 4,000 வரை பதிவு செய்யப்பட்டு வருகின்றன. புதிய வாகனங்களை பதிவு செய்யும்போது, அந்த வாகனத்தை வட்டார போக்குவரத்து அலுவலகத்துக்கு கட்டாயம் கொண்டு வர வேண்டும் என்ற நடைமுறை இருக்கிறது. அதனால், அந்த வாகனத்தின் உரிமையாளரோ அல்லது விற்பனை பிரதிநிதியோ, ஆர்.டி.ஓ., ஆபீஸ் செல்ல வேண்டிய கட்டாயம் உள்ளது. தற்போது, மோட்டார் வாகன புதிய சட்ட திருத்தத்தின்படி, 'சொந்த பயன்பாட்டு வாகனங்கள் பதிவின்போது, அவற்றை வட்டார போக்குவரத்து அலுவலகத்துக்கு கொண்டு வர தேவையில்லை' என தெரிவிக்கப்பட்டுள்ளது. இது, தமிழகத்தில் இதுவரை அமல்படுத்தப் படாமல் இருந்தது. இது தொடர்பாக, ஆட்டோமொபைல் டீலர்கள் சங்கம் தொடர்ந்த வழக்கில், 'மோட்டார் வாகன புதிய சட்ட திருத்தத்தின் படி, சொந்த பயன்பாட்டுக்கான புதிய வாகனங்களை, வட்டார போக்குவரத்து அலுவலகத்துக்கு கொண்டு வருவதில் விலக்கு அளிக்க வேண்டும்' என, அரசுக்கு உயர் நீதிமன்றம் உத்தரவிட்டுள்ளது. அதனால், சொந்த பயன்பாட்டிற்கான புதிய வாகனங்களை பதிவு செய்ய, வட்டார போக்குவரத்து அலுவலகத்துக்கு கொண்டு வர தேவைஇல்லை. இந்த புதிய உத்தரவை நாளை முதல் அமல்படுத்த வேண்டும் என, அனைத்து வட்டார போக்குவரத்து அலுவலகங்களுக்கும், தமிழக போக்குவரத்து துறை ஆணையர் கஜலட்சுமி உத்தரவிட்டுள்ளார். இதுகுறித்து, போக்குவரத்து ஆணையரக அதிகாரிகள் கூறியதாவது: சொந்த பயன்பாட்டிற்கான வாகனங்களை பதிவு செய்யும்போது, சம்பந்தப்பட்ட டீலர்கள், வட்டார போக்குவரத்து அலுவலகத்துக்கு அவற்றை எடுத்து வருவர். இதற்காக, வாடிக்கையாளர்களிடம் தனி கட்டணம் வசூலிப்பர். சொந்த பயன்பாட்டு வாகனங்களில், 70 சதவீதம் இருசக்கர வாகனங்களாக இருக்கும். புதிய மோட்டார் வாகன திருத்த சட்டத்தின்படி, பைக், கார் போன்ற சொந்த பயன்பாட்டு வாகனங்களை கொண்டு வர தேவைஇல்லை. இருப்பினும், வணிக பயன்பாட்டிற்கான வாகன பதிவின்போது, கட்டாயம் அந்த வாகனங்களை ஓட்டி வர வேண்டும். இவ்வாறு அவர்கள் கூறினர்.