வெளிமாநிலங்களுக்கு ஆம்னி பஸ்கள் 18 நாட்களுக்கு பின் மீண்டும் இயக்கம்

சென்னை: போக்குவரத்து துறை அமைச்சர் சிவசங்கருடன் நடந்த பேச்சில் உடன்பாடு ஏற்பட்டதால், மாநிலங்களுக்கு இடையேயான ஆம்னி பஸ்களின் சேவை, 18 நாட்களுக்கு பின், நேற்று முதல் மீண்டும் துவங்கியது. கடந்த 7ம் தேதி கேரளா சென்ற தமிழக ஆம்னி பஸ்களுக்கு, அம்மாநில போக்குவரத்து துறை அதிகாரிகள், சாலை வரி உட்பட பல்வேறு காரணங்களைக் கூறி, 70 லட்சம் ரூபாய் வரை அபராதம் விதித்தனர். இதற்கு எதிர்ப்பு தெரிவித்து, அனைத்து ஆம்னி பஸ் உரிமையாளர்கள் சங்கத்தினர், தமிழகத்தில் இருந்து வெளிமாநிலங்களுக்கு இயக்கப்பட்ட, 230க்கும் மேற்பட்ட ஆம்னி பஸ்களை நிறுத்தினர். இதுதொடர்பாக, அமைச்சர் சிவசங்கர், ஆம்னி பஸ் உரிமையாளர்களுடன் பேச்சு நடத்தினார். இதில், உடன்பாடு ஏற்பட்டது. அதைத்தொடர்ந்து 18 நாட்களுக்கு பின், தமிழகத்தில் இருந்து வெளிமாநிலங்களுக்கு நேற்று முதல் மீண்டும் ஆம்னி பஸ் சேவை துவங்கியது. இதுகுறித்து, அனைத்து ஆம்னி பஸ் உரிமையாளர்கள் சங்கத்தின் தலைவர் அன்பழகன் கூறியதாவது: மத்திய அரசால் உருவாக்கப்பட்ட, 'ஆல் இந்தியா டூரிஸ்ட் பர்மிட்' விதிகளின்படி, தமிழகத்தில் இன்றுவரை அண்டை மாநி ல பஸ் களுக்கு சாலை வரி வசூலிக்கப்படுகிறது. அதேபோல, நாங்களும் வசூலிக்கிறோம் என, கேரளா, கர்நாடகா மாநில அதிகாரிகள் தெரிவித்தனர். இதைக் கண்டித்து, வெளிமாநிலங்களுக்கு ஆம்னி பஸ்கள் இயக்குவதை நிறுத்தினோம். எங்கள் கோரிக்கைகள் குறித்து, அமைச்சர் சிவங்கர் மற்றும் போக்குவரத்து ஆணையர் கஜலட்சுமி ஆகியோருடன் பேச்சு நடத்தப்பட்டது. ஆம்னி பஸ்கள் நிறுத்தத்தால், தினமும், 4 கோடி ரூபாய் வரை இழப்பு ஏற்பட்டது. இதுவரை, 84 கோடி ரூபாய்க்கு மேல் இழப்பு ஏற்பட்டுஉள்ளது. எங்களின் கோரிக்கையை பரிசீலிப்பதாகவும், முதல்வரை சந்தித்து பேசி நல்ல முடிவை ஏற்படுத்தி தருவதாகவும், அமைச்சர் உறுதி அளித்து உள்ளார். அதை ஏற்று, பயணியர் நலனையும், சபரிமலை அய்யப்பன் கோவில் செல்லும் பக்தர்கள் நலனையும் கருத்தில் வைத்து, வெளி மாநிலங்களுக்கு நேற்று முதல் மீண்டும் ஆம்னி பஸ்களை இயக்க துவங்கி உள்ளோம். இவ்வாறு அவர் கூறினார்.