வன்கொடுமை தடுப்பு சட்டம் அமல்படுத்த கோரி ஆர்ப்பாட்டம்

சென்னை: எஸ்.சி., -- எஸ்.டி., சங்கங்களின் கூட்டமைப்பு சார்பில் , வன்கொடுமை தடுப்பு சட்டத்தை தீவிரமாக அமல்படுத்தக்கோரி, சென்னையில் ஆர்ப்பாட்டம் நடந்தது. பின், தலித் விடுதலை இயக்க தலைவர் கருப்பையா கூறியதாவது: எஸ்.சி., - எஸ்.டி., சமூக மக்களை, ஜாதி ரீதியான தாக்குதலில் இருந்து பாதுகாக்கும் வகையில், வன்கொடுமை தடுப்புச் சட்டம் இயற்றப்பட்ட போதிலும், தமிழகத்தில் இச்சமூக மக்களுக்கு எதிரான தீண்டாமை சம்பவங்கள் குறையவில்லை. மாறாக, காதல் திருமணம், பொது வழி ஆக்கிரமிப்பு, கோவிலில் நுழைய அனுமதி மறுப்பது, மயான வசதி இல்லாமை என, இச்சமூகத்தினருக்கு எதிரான குற்றச் சம்பவங்கள் தொடர்கின்றன. எனவே, வன்கொடுமை தடுப்புச் சட்டத்தை தீவிரமாக அமல்படுத்தக்கோரி, அரசை தொடர்ந்து வலியுறுத்தி வருகிறோம். இருப்பினும், அதிகாரிகள் இப்பிரச்னையில் எந்த நடவடிக்கையும் எடுக்காமல் உள்ளனர். இத்தகைய அலட்சிய போக்கால், தர்மபுரி அருகே சமீபத்தில் இரண்டு தலித் இளைஞர்கள், மாற்றுச் சமூகத்தினரால் படுகொலை செய்யப்பட்டு உள்ளனர். இவ்வாறு அவர் கூறினார்.