அனல் மின் நிலைய ஊழியர்களுக்கு சனி விடுமுறை

சென்னை: அனல் மின் நிலைய ஊழியர்களுக்கு மாதத்தின் இரண்டாவது, நான்காவது சனிக்கிழமைகளில் விடுமுறை அறிவித்து, தமிழக மின் வாரியம் உத்தரவிட்டுள்ளது. திருவள்ளூர், சேலம், துாத்துக்குடி மாவட்டங்களில் மின் வாரியத்திற்கு, 5,120 மெகா வாட் திறனில், ஐந்து அனல் மின் நிலையங்கள் உள்ளன. அவற்றில் பணிபுரியும் ஊழியர்களுக்கு, அனைத்து சனிக்கிழமைகளும் வேலை நாள். அலுவலகங்கள், மின் கட்டண மையங்களுக்கு, இரண்டாவது சனிக்கிழமை விடுமுறையாகவும், மற்ற சனிக்கிழமை வேலை நாளாகவும் இருந்தது. கடந்த, 2018 மார்ச் முதல், நான்காவது சனிக்கிழமையும் விடுமுறை விடப்படுகிறது. தொழிற்சங்கங்களின் தொடர் கோரிக்கையை அடுத்து, அனல் மின் நிலையங்களின் ஊழியர்களுக்கும் இனி இரண்டாவது, நான்காவது சனிக்கிழமை விடுமுறை அறிவித்து, மின் வாரியம் நேற்று முன்தினம் உத்தரவிட்டு உள்ளது. காலை, 8:30 மணி முதல் மாலை, 5:30 வரை இருந்த வேலை நேரம், மாலை, 5:45 மணி நேரம் வரை நீட்டிக்கப்பட்டு உள்ளது.