இன்று சிறப்பு வகுப்புகள் கூடாது பள்ளி கல்வித்துறை அறிவிப்பு

சென்னை: 'டிட்வா' புயல் எச்சரிக்கை விடுக்கப்பட்டுள்ள நிலையில், தமிழகத்தில் இன்று மாணவ - மாணவியருக்கு, சிறப்பு வகுப்புகள் நடத்தக்கூடாது என, பள்ளிக்கல்வித்துறை அறிவுறுத்தி உள்ளது. தென்மேற்கு வங்கக்கடல் மற்றும் அதை ஒட்டியுள்ள, இலங்கை கடலோர பகுதிகளில், 'டிட்வா' புயல் நிலை கொண்டுள்ளது. இதன் காரணமாக, இன்று, கடலுார், மயிலாடுதுறை, விழுப்புரம் மற்றும் செங்கல்பட்டு மாவட்டங்களுக்கு, 'ரெட்' அலர்ட்டும், பல மாவட்டங்களுக்கு கனமழை எச்சரிக்கையும் விடுக்கப்பட்டுள்ளது. தமிழகத்தில் பள்ளிகளுக்கு, ஆண்டு அட்டவணையின்படி, இன்று விடுமுறை அறிவிக்கப்பட்டுள்ளது. தற்போது, பெரும்பாலான மாவட்டங்களுக்கு கனமழை எச்சரிக்கை விடுக்கப்பட்டுள்ளதால், தமிழகம் முழுதும் உள்ள அனைத்து வகை பள்ளிகளிலும், மாணவ - மாணவியருக்கு சிறப்பு வகுப்புகள் நடத்தக் கூடாது என, பள்ளிக்கல்வித்துறை உத்தரவிட்டுள்ளது. மீறினால் நடவடிக்கை எடுக்கப்படும் என்றும் எச்சரித்துள்ளது.