பணிச்சுமையை குறைக்க கேட்டு சர்வேயர் சங்கம் சென்னையில் ஆர்ப்பாட்டம்

சென்னை: 'சிறப்பு வாக்காளர் பட்டி யல் திருத்த பணியுடன், வழக்கமான நில அளவை பணியையும் மேற்கொள் ளும்படி கட்டாயப்படுத்தக் கூடாது' என்பது உட்பட, பல்வேறு கோரிக்கைகளை வலியுறுத்தி, சர்வேயர்கள் எனப்படும் நில அளவை அலுவலர்கள் சங்கம் சார்பில், சென்னை சேப்பாக்கத்தில், நேற்று ஆர்ப்பாட்டம் நடந்தது. இதுகுறித்து, சங்கத்தின் மாநில தலைவர் வெ.மகேந்திரகுமார் கூறியதாவது: தமிழகத்தில் மக்கள் தொகைக்கு ஏற்ற எண்ணிக்கையில், நில அளவர் பணியிடங்கள் இல்லை. அதே நேரம், நில அளவையாளர்களுக்கு, பணிச்சுமை நாளுக்கு நாள் அதிகரித்து வருகிறது. இந்நிலையில், சிறப்பு வாக்காளர் பட்டியல் திருத்த பணியில், நில அளவைத் துறையினர், கட்டாயப்படுத்தி ஈடுபடுத்தப்படுகின்றனர். இப்பணிக்கு செல்லும் நிலையில், வழக்கமான நில அளவை பணிகளையும் மேற்கொள்ள, அதிகாரிகள் நெருக்கடி கொடுக்கின்றனர். மாவட்ட அளவில் உள்ள உயரதிகாரிகள் கட்டாயப்படுத்துவதால், பகலில் நில அளவை பணியிலும், இரவில் வாக்காளர் கணக்கெடுப்பு படிவங்களை கணினியில் பதிவேற்றும் பணியிலும் ஈடுபடுகிறோம். இதை கைவிட வேண்டும். தமிழகத்தில், 1,042 குறுவட்ட நில அளவையர் பணியிடங்கள் தரம் இறக்கப்பட்டன. இதில், 540 பணியிடங்கள், மீண்டும் குறுவட்ட அளவையர் பணியிடங்களாக தரம் உயர்த்தப்பட்டன. மீதியுள்ள, 502 பணியிடங்களையும், தரம் உயர்த்த வேண்டும் என்பது உட்பட, பல்வேறு கோரிக்கைளை வலியுறுத்தி ஆர்ப்பாட்டம் நடத்தி உள்ளோம். இவ்வாறு அவர் கூறி னார்.