இன்று! தமிழகத்திற்குள் நுழைகிறது ‛டிட்வா புயல்

சென்னை : தமிழகத்தின் வட மாவட்டங்களை நெருங்கும் 'டிட்வா' புயல், இன்று மாலையில் வலுவிழக்கத் துவங்கும் என்றும், கரையை கடக்க வாய்ப்பு இல்லை என்றும் சென்னை வானிலை ஆய்வு மையம் தெரிவித்துள்ளது. ஆனாலும், பலத்த மழையை தரும் என்பதால், திருவள்ளூர், ராணிப்பேட்டை மாவட்டங்களுக்கு, 'ரெட் அலெர்ட்' எச்சரிக்கை விடப்பட்டு உள்ளது. மேலும், ஒன்பது மாவட்டங்களுக்கு 'ஆரஞ்ச் அலெர்ட்' அறிவிக்கப்பட்டு உள்ளது. வங்கக்கடலில் இலங்கை அருகே உருவான டிட்வா புயல், தமிழக கடலோர பகுதிகளை நோக்கி நகர்ந்து வருகிறது. இதன் காரணமாக, தென் மற்றும் கடலோர மாவட்டங்களில் கன மழை கொட்டித் தீர்க்கிறது. நேற்று காலை 8:30 மணியுடன் நிறைவு பெற்ற 24 மணி நேரத்தில் அதிகபட்சமாக, நாகை மாவட்டம் கோடியக்கரையில் 25 செ.மீ., அதிகனமழை பெய்துள்ளது. வேதாரண்யத்தில் 19 செ.மீ., வேளாங்கண்ணியில் 13 செ.மீ., கனமழை பெய்தது. ராமநாதபுரம் மாவட்டம் பாம்பனில் 10 செ.மீ., மழை பதிவானது. நேற்று காலை 8:30 முதல் மாலை 3:30 மணி வரை நிலவரப்படி, காரைக்காலில் 13 செ.மீ., மற்றும் நாகையில் 11 செ.மீ., கனமழை பெய்துள்ளது. இந்நிலையில், இந்திய வானிலை ஆய்வு மையத்தின் தென்மண்டல தலைவர் அமுதா கூறியதாவது: இலங்கை கடலோரப் பகுதிகள் மற்றும் அவற்றை ஒட்டிய தென்மேற்கு வங்கக்கடல் பகுதிகளில் நிலவிய டிட்வா புயல், வடக்கு வடமேற்கு திசையில் மணிக்கு 10 கி.மீ., வேகத்தில் நகர்ந்தது. இது, நேற்று மதியம் 2:30 மணியளவில், வேதாரண்யத்திலிருந்து கிழக்கு தென்கிழக்கே 90 கி.மீ., தொலைவிலும், காரைக்காலுக்கு தென்கிழக்கே 120 கி.மீ., தொலைவிலும், புதுச்சேரியில் இருந்து தெற்கு -தென் கிழக்கே 220 கி.மீ., தொலைவிலும், சென்னைக்கு தெற்கே 330 கி.மீ., தொலைவிலும் நிலை கொண்டுள்ளது. வடக்கு வடமேற்கு திசையில் புயல் நகரும்போது, தமிழகத்தின் வட மாவட்டங்கள், புதுச்சேரி மற்றும் கடலோரப் பகுதிகளில் இருந்து இன்று அதிகாலை 50 கி.மீ., தொலைவிலும், மாலையில் 25 கி.மீ., தொலைவிலும், அதன் மையப்பகுதி நிலவும் வாய்ப்பு உள்ளது. டிட்வா புயல் இன்று மாலை முதல் நாளை அதிகாலைக்குள், காற்றழுத்த தாழ்வு மண்டலமாக வலுவிழக்க வாய்ப்பு உள்ளது. புயலின் நகர்வை கணிக்கும்போது, அது கரையை ஒட்டியே நிலவும்; கரையை கடக்க வாய்ப்பு இல்லை. இதன் காரணமாக, திருவள்ளூர், ராணிப்பேட்டையில் இன்று கனமழை முதல் மிக கனமழையும், ஒரு சில இடங்களில் அதிகனமழையும் பெய்யும் என்பதால், ரெட் அலெர்ட் எச்சரிக்கை விடப்பட்டுள்ளது. சென்னை, காஞ்சிபுரம், செங்கல்பட்டு, விழுப்புரம், திருவண்ணாமலை, வேலுார், திருப்பத்துார், கிருஷ்ணகிரி மற்றும் தர்மபுரி ஆகிய ஒன்பது மாவட்டங்களில் கனமழை முதல் மிக கனமழை பெய்யும் என்பதால், ஆரெஞ்ச் அலெர்ட் அறிவிக்கப்பட்டுள்ளது. மேலும், சேலம், கள்ளக்குறிச்சி, கடலுார் மாவட்டங்கள், புதுச்சேரியில் கனமழை பெய்ய வாய்ப்புள்ளது. சென்னையில் இடைவெளி விட்டு, இன்று கனமழை முதல் மிக கனமழை பெய்யும். நாளை முதல் மழை படிப்படியாக குறையும். திருவள்ளூர் மாவட்டத்தில் மட்டும் கனமழை தொடர வாய்ப்புள்ளது. நாளை மறுநாள் முதல் டிச., 5 வரை, தமிழகம், புதுச்சேரி, காரைக்கால் பகுதிகளில் இடி, மின்னலுடன் கூடிய மழைக்கு வாய்ப்பு உள்ளது. இன்று, வட மாவட்டங்கள் மற்றும் புதுச்சேரியில் மணிக்கு 60 கி.மீ., முதல் 70 கி.மீ., வேகத்திலும், இடையிடையே 80 கி.மீ., வேகத்திலும் பலத்த தரைக்காற்று வீசும். இவ்வாறு அவர் கூறினார். 'அக்., 1 முதல் நவ., 29 வரையிலான வடகிழக்கு பருவ மழை காலக்கட்டத்தில், 36 செ.மீட்டர் மழை பெய்துள்ளது. இது, இயல்பை விட 3 சதவீதம் அதிகம்' என வானிலை மையம் தெரிவித்துள்ளது. மீனவர்களுக்கு எச்சரிக்கை சூறைக்காற்று வீசும் என்பதால், ஆந்திர கடலோரப் பகுதி, தமிழக கடலோரப் பகுதி, மத்திய மேற்கு வங்கக் கடல் பகுதி, மன்னார் வளைகுடா, குமரிக்கடல் பகுதி, தென்மேற்கு வங்கக்கடல் பகுதிக்கு இன்று மீனவர்கள் செல்ல வேண்டாம் என வானிலை ஆய்வு மையம் எச்சரித்துள்ளது. மழை பாதிப்பிலிருந்து மக்களை காக்கவும் டிட்வா புயல் காரணமாக, தமிழகத்தில் அதி கனமழைக்கான எச்சரிக்கை விடுக்கப்பட்டுள்ளது. எத்தகைய அசம்பாவிதமும் ஏற்படாமல் இருக்க, போர்க்கால அடிப்படையில் தி.மு.க., அரசு போதிய முன்னெச்சரிக்கை நடவடிக்கைகளை எடுத்து, விழிப்புடன் செயலாற்ற வேண்டும். அதேநேரம், தமிழக மக்களின் துயர் துடைத்து தோள் கொடுக்கும் விதமாக, தமிழக பா.ஜ., சொந்தங்கள் களத்தில் முன்னின்று, மக்களை பாதிப்பிலிருந்து காக்க வேண்டும். * நயினார் நாகேந்திரன், தமிழக பா.ஜ., தலைவர் *** 13 நிவாரண முகாம்களில் 1,058 பேர் அடைக்கலம் புயல் எச்சரிக்கையை தொடர்ந்து, 13 நிவாரண முகாம்களில் 1,058 பேர் தங்க வைக்கப்பட்டு உள்ளதாக அமைச்சர் சாத்துார் ராமச்சந்திரன் தெரிவித்தார். இது குறித்து, அவர் கூறியதாவது: 'புயல் எச்சரிக்கையை தொடர்ந்து, தமிழகத்தில் 13 நிவாரண மையங்கள் ஏற்பாடு செய்யப்பட்டு, 1,058 நபர்கள் தங்க வைக்கப்பட்டுள்ளனர். அவர்களுக்கு தேவையான உணவு, படுக்கை வசதி ஏற்பாடு செய்யப்பட்டுள்ளது. குழந்தைகள் பாதுகாப்புக்கு கூடுதல் கவனம் செலுத்தி வருகிறோம். திடீர் தேவைக்காக, 5 கிலோ அரிசி பாக்கெட்டுகள் ஐந்து லட்சம் வரை தயாராக வைக்கப்பட்டுள்ளன. மழையால், 16 கால்நடைகள் உயிரிழந்துள்ளன; 24 குடிசைகள் சேதமடைந்துள்ளன. அனைத்து பகுதிகளிலும் மீட்புப் படைகள் தயாராக உள்ளன. இவ்வாறு அவர் கூறினார்.