பாம்பன் பாலத்தில் ரயிலுக்கு தடை

இலங்கை அருகே உருவான டிட்வா புயலால், நேற்று முன்தினம் இரவு முதல், நேற்று மாலை வரை ராமேஸ்வரம் பகுதியில், மணிக்கு 60 முதல் 68 கி.மீ., வேகத்தில் சூறாவளி காற்று வீசியது. இதனால், ராமேஸ்வரம், தனுஷ்கோடி, பாம்பன் கடலில் கொந்தளிப்பு ஏற்பட்டு ராட்சத அலைகள் எழுந்தன. ராமேஸ்வரம் ஓலைகுடா மீனவர் கிராம சாலை சேதமடைந்து போக்குவரத்து துண்டிக்கப்பட்டது. ராமேஸ்வரம் கடற்கரையில் நிறுத்தியிருந்த விசைப்படகு ஒன்றின் நங்கூரக் கயிறு அறுந்து, சேராங்கோட்டை கடற்கரையில் ஒதுங்கி சேதமடைந்தது. இப்படகை மீட்க முடியாமல் மீனவர்கள் சிரமப்பட்டனர். ரயிலுக்கு தடை தனுஷ்கோடிக்கு நேற்று சுற்றுலா பயணியர் செல்ல போலீசார் தடை விதித்தனர். இதனால், அவர்கள் ஏமாற்றத்துடன் திரும்பிச் சென்றனர். மேலும், பாம்பன் பாலத்தில் ரயில் செல்ல தடை விதிக்கப்பட்டது. இதனால், கன்னியாகுமரி, திருவனந்தபுரம், சென்னை தாம்பரத்தில் இருந்து ராமேஸ்வரம் வர வேண்டிய ஐந்து எக்ஸ்பிரஸ் ரயில்களும், திருச்சியில் இருந்து ராமேஸ்வரம் வரும் பயணியர் ரயிலும், ராமநாதபுரம் மற்றும் மண்டபம் ரயில் நிலையங்களிலேயே நேற்று நிறுத்தப்பட்டன; மீண்டும் அங்கிருந்தே புறப்பட்டும் சென்றன. இதனால், ராமேஸ்வரத்தில் காத்திருந்த பயணியர் அரசு பஸ் மூலம் மண்டபம், ராமநாதபுரத்திற்கு சிரமத்துடன் சென்றனர். மேலும், நேற்று முன்தினம் ஓகாவில் இருந்து ராமேஸ்வரம் வந்த எக்ஸ்பிரஸ் ரயில், நேற்று மீண்டும் ஓகா செல்ல இருந்த நிலையில் ரத்து செய்யப்பட்டது. இதனால், ராமேஸ்வரத்தில் தங்கியுள்ள பக்தர்கள், சுற்றுலா பயணியர் ஏமாற்றம் அடைந்தனர். வெறிச்சோடியது மேலும், சூறாவளி காற்று, மிதமான மழையால் அச்சமடைந்த பக்தர்கள் மற்றும் சுற்றுலா பயணியர் ராமேஸ்வரம் வராததால், பாம்பன் தேசிய நெடுஞ்சாலை பாலம், ராமேஸ்வரம் கோவில் ரத வீதி, தனுஷ்கோடியில் மக்கள் நடமாட்டமின்றி நேற்று வெறிச்சோடி கிடந்தது. உள்ளூர் மக்கள் வீடுகளில் இருந்து வெளியேற முடியாமல் பாதிக்கப்பட்டனர்.