பெண்களுக்கு எதிரான குற்றங்கள்; தடுக்க உதயநிதி அறிவுறுத்தல்

சென்னை: பெண்கள் மற்றும் குழந்தைகளுக்கு எதிரான குற்றங்கள் அதிகரித்து வரும் நிலையில், அவற்றின் விபரங்களை பெற்ற துணை முதல்வர் உதயநிதி, குற்றங்களை தடுக்க உரிய நடவடிக்கை எடுக்கும்படி, போலீஸ் அதிகாரிகளை அறிவுறுத்தி உள்ளார். தமிழகத்தில், 2019ல், பெண்களுக்கு எதிரான குற்ற சம்பவங்களின் எண்ணிக்கை, 5,934 ஆக இருந்தது. தி.மு.க., அரசு பெறுப்பேற்ற பின், கடந்த மூன்று ஆண்டுகளில், 50.71 சதவீதம் அதிகரித்துள்ளது. குழந்தைகளுக்கு எதிரான குற்ற சம்பவங்களும் உயர்ந்துள்ளன. 2021ல், குழந்தைகளுக்கு எதிரான குற்ற சம்பவங்களின் எண்ணிக்கை, 6,064 ஆக இருந்தது. அதுவே, 2023ல், 6,968 ஆக அதிகரித்துள்ளது. இந்நிலையில், பெண்கள் மற்றும் குழந்தைகளுக்கு எதிரான குற்றங்கள், அவற்றின் மீது எடுக்கப்பட்ட நடவடிக்கைகள் குறித்த புள்ளி விபரங்களை, காவல் துறை அதிகாரிகளிடம், துணை முதல்வர் உதயநிதி கேட்டுப் பெற்றுள்ளார். அத்துடன் குற்றங்களை தடுக்க, உரிய நடவடிக்கை எடுக்கும்படி, காவல் துறை அதிகாரிகளுக்கு அறிவுறுத்தி உள்ளார். இதுகுறித்து போலீசார் கூறியதாவது: தமிழக காவல் துறையில், பெண்கள் மற்றும் குழந்தைகளுக்கு எதிரான குற்றத்தடுப்பு பிரிவு செயல்படுகிறது. இதனுடன், 244 மகளிர் போலீஸ் நிலையங்கள், ஆள் கடத்தல், பெண்களுக்கு எதிரான குற்றங்களை விசாரிக்கும் சிறப்பு புலனாய்வு குழுக்கள், குழந்தைகடத்தல் தடுப்பு பிரிவுகள் இணைக்கப்பட்டு உள்ளன. ஐ.ஜி., தலைமையில் செயல்படும் இப்பிரிவு, மாநிலம் முழுதும், ஆய்வுக் கூட்டங்கள் நடத்தி, பெண்கள் மற்றும் குழந்தைகளுக்கு எதிரான, குற்றத்தடுப்பு பணிகளை முடுக்கி வருகிறது. எனினும், குற்றங்கள் குறையவில்லை. இந்நிலையில், அதிகாரிகளை துணை முதல்வர் அழைத்து பேசிய பின், பெண்கள் மற்றும் குழந்தைகளுக்கு எதிரான குற்றத்தடுப்பு பிரிவு செயல்பாடு வேகம் எடுக்க துவங்கி உள்ளது. இவ்வாறு அவர்கள் கூறினர்.