ரோலக்ஸ் யானை  உயிரிழப்புக்கு என்ன காரணம்: சம்பவ இடத்தில் பிரேத பரிசோதனை

வால்பாறை: கோவை மாவட்டம், தொண்டாமுத்துார் மற்றும் அதை சுற்றியுள்ள பகுதியில் 'ரோலக்ஸ்' என்று பெயரிடப்பட்ட ஒற்றை யானை விவசாய பயிர்களை சேதப்படுத்தியதோடு, மனிதர்களையும் அச்சுறுத்தி வந்தது. இதனையடுத்து, வனத்துறையினர் கடந்த அக். மாதம், 16ம் தேதி கும்கி யானைகளின் உதவியுடன் மயக்க ஊசி செலுத்தி, லாரியில் ஏற்றி ஆனைமலை வரகலியாறு யானைகள் முகாமிற்கு கொண்டு சென்றனர். அங்கு ரோலக்ஸ் யானைக்கு 'ரேடியோ காலர்' பொருத்திய பின், கடந்த 12ம் தேதி மானாம்பள்ளி வனச்சரகத்திற்கு உட்பட்ட மந்திரிமட்டம் வனப்பகுதியில் விடுவித்தனர். யானையின் நடமாட்டத்தை வனத்துறையினர் கண்காணித்து வந்தனர். இந்நிலையில், கடந்த 19ம் தேதி, அங்குள்ள ஆற்றில் தண்ணீர் குடிக்க சென்ற யானை வழுக்கி விழுந்து உயிரிழந்ததாக வனத்துறையினர் அறிவித்தனர். இதனையடுத்து, தலைமை வன உயிரின காப்பாளர், தலைமை அலுவலக மூத்த அதிகாரி வேணுபிரசாந்த் தலைமையில் உண்மை கண்டறியும் குழு அமைக்கப்பட்டது. ரேடியோ காலர், ஜி.பி.எஸ்.,தரவு, சிகிச்சை மற்றும் இறப்பிற்கான காரணம் குறித்து ஆய்வு செய்யப்பட்டது. நேற்று முன்தினம் பிரேத பரிசோதனை நடந்தது. வனத்துறை கால்நடை மருத்துவர் டாக்டர் வெண்ணிலா, கோவை உதவி கால்நடை மருத்துவர் டாக்டர் கலைவாணன் ஆகியோர், சம்பவ இடத்திலேயே பிரேத பரிசோனை செய்தனர்.

வனத்துறை அறிக்கை

மந்திரிமட்டம் நீரோடையில் இறந்த ரோலக்ஸ் யானைக்கு, 50 வயது. இந்த யானை தண்ணீர் குடிக்க இறங்கிய போது, 25 அடி பள்ளத்தில் கால் சறுக்கி கிழே விழுந்தது. இதில் திடீர் மாரடைப்பு ஏற்பட்டு உயிரிழந்துள்ளது. மேலும் இதயத்தில் வீக்கமும், ரத்த கசிவும் இருப்பது, பிரேத பரிசோதனையில் கண்டறியப்பட்டது. யானைக்கு ஏற்கனவே சில நோய் பாதிப்பு உள்ள நிலையில், கிழே விழுந்ததில் காலில் படுகாயமும் ஏற்பட்டுள்ளது. இவ்வாறு, தெரிவிக்கப்பட்டுள்ளது.