முதுகில் குத்துவது குறித்து அமைச்சர் ரகுபதி பாடம் எடுப்பதா? அ.தி.மு.க., கண்டனம்

சென்னை: 'பதவிக்காக அறிவாலய வாசலில் நிற்கும் அமைச்சர் ரகுபதிக்கு, அ.தி.மு.க., பொதுச்செயலர் பழனி சாமியை விமர்சிக்க தகுதியில்லை' என, அ.தி.மு.க., முன்னாள் அமைச்சர் ஜெயகுமார் கண்டனம் தெரிவித்துள்ளார். அவரது அறிக்கை: தனக்கு அரசியல் வாழ்வு அளித்த ஜெயலலிதாவின் முதுகில் குத்திவிட்டு, கோபாலபுர கொத்தடிமைகளில் ஒருவராக திகழும் அமைச்சர் ரகுபதி, முதுகில் குத்துவது பற்றி மற்றவர்களுக்கு பாடம் எடுக்கிறார். அரசியலில் அவர் உயர, ஏணிப்படியாக இருந்தவர்களை அவர் அழித்த வரலாறு அனைவருக்கும் தெரியும். விவசாயத் தொழிலைப் பற்றி கேலியும் கிண்டலுமாக முதல்வர் ஸ்டாலின் பேசியதற்கு, அ.தி.மு.க., பொதுச்செயலர் பழனிசாமி பதிலளித்தார். நெல் கொள்முதலுக்கான ஈரப்பதத்தை 22 சதவீதமாக உயர்த்த, 39 எம்.பி.,க்களை வைத்துக் கொண்டு, முதல்வர் ஸ்டாலின் என்ன செய்தார் என கேள்வி எழுப்பினார். டெல்டாவை பாலைவனமாக்கும் ஹைட்ரோ கார்பன்-, மீத்தேன் திட்டங் களுக்கு அனுமதி அளித்துவிட்டு , தற்போது நீலிக்கண்ணீர் வடிக்கும் ஸ்டாலினின் விவசாயிகள் விரோதப்போக்கை, பழனிசாமி அம்பலப்படுத்தினார். கர்நாடக அரசின் மேகதாது அணை திட்டத்தை, சுயநலத்திற்காக கண்டும் காணாமலும் இருக்கும் ஸ்டாலினின் கபட நாடகத்தை வெளிப்படுத்தினார். இவை எதற்கும் முறையாக பதில் சொல்ல முடியாமல், பழனிசாமி மீது குற்றம் சாட்டுகிறார் ரகுபதி. பதவிக்காக அறிவாலய வாசலில் நிற்கும் ரகுபதிக்கு, அ.தி.மு.க., பற்றியோ, பழனிசாமி பற்றியோ விமர்சிக்க எந்த அருகதையும் இல்லை. இவ்வாறு அவர் கூறியுள்ளார்.