இலங்கையை புரட்டி போட்ட டிட்வா புயல்; வெள்ளம், நிலச்சரிவால் 56 பேர் உயிரிழப்பு

கொழும்பு: வங்கக்கடலில் உருவாகியுள்ள, 'டிட்வா' புயலால், இலங்கையில் கனமழை பெய்து வருகிறது. அங்கு மழை தொடர்பான விபத்துகளில் இதுவரை, 56 பேர் உயிரிழந்துள்ளனர். வங்கக் கடலில் உருவாகியுள்ள, 'டிட்வா' புயலால், நம் அண்டை நாடான இலங்கையில், கடந்த சில நாட்களாக கனமழை பெய்து வருகிறது. இதனால் அங்குள்ள பல்வேறு மாகாணங்களில் இடியுடன் கூடிய கனமழையும், பலத்த காற்றும் வீசி வருகிறது. திருகோணமலை, பதுல்லா, மாத்தறை, மட்டக்களப்பு, நுவரெலியா உள்ளிட்ட பல்வேறு பகுதிகள் வெள்ளத்தில் தத்தளிக்கின்றன. தொடர் மழையால் ஆறுகளில் வெள்ளம் பாய்ந்தோடுகிறது. நீர்த்தேக்கங்கள் முழு கொள்ளளவை எட்டியதால் திறந்து விடப்பட்டுள்ளன. தேயிலை தோட்டங்கள் நிறைந்த பதுல்லா மாவட்டத்தில் நிலச்சரிவு ஏற்பட்டதில் வீடுகள் மண்ணுக்குள் புதைந்தன. இதில், 16 பேர் உயிருடன் புதைந்தனர். இலங்கையில் வெள்ளம், நிலச்சரிவால் இதுவரை, 56 பேர் பலியாகி உள்ளனர். கடந்த மூன்று நாட்களில் மட்டும், 46 பேர் உயிரிழந்துள்ளனர். திருப்பி விடப்பட்ட விமானங்கள் மாயமான 21 பேரை தேடும் பணி முழு வீச்சில் நடக்கிறது. பல்வேறு இடங்களில் ரயில் தண்டவாளங்கள் வெள்ளத்தால் மூழ்கியுள்ளதால், ரயில் சேவையும் முடங்கி உள்ளது. மேலும், விமான சேவையும் பாதிக்கப்பட்டுள்ளது. நாட்டின் பெரும்பாலான பகுதிகளில் மணிக்கு, 90 கி.மீ., வேகத்தில் சூறைக்காற்று வீசும் என, வானிலை ஆய்வு மையம் எச்சரித்துள்ளது. 'டிட்வா' புயல் காரணமாக, இலங்கை செல்ல வேண்டிய ஐந்து விமானங்கள் கேரளாவின் திருவனந்தபுரம் சர்வதேச விமான நிலையத்திற்கு திருப்பி விடப்பட்டன. துபாய் மற்றும் தோஹாவிலிருந்து தலா ஒரு ஸ்ரீலங்கன் ஏர்லைன்ஸ் விமானம், அபுதாபியிலிருந்து எத்தியாட் ஏர்வேஸ் விமானம், கோலாலம்பூரிலிருந்து ஏர் ஏசியா விமானம் திருப்பி விடப்பட்டது. மும்பையில் இருந்து கொழும்பு புறப்பட்ட இண்டிகோ விமானமும், மோசமான வானிலை காரணமாக, திருவனந்தபுரம் சர்வதேச விமான நிலையத்தில் தரையிறங்கியது.

இந்தியா துணை நிற்கும்: பிரதமர் மோடி

சமூக வலைதளத்தில் பிரதமர் மோடி நேற்று வெளியிட்ட பதிவு: 'டிட்வா' புயலால் தங்கள் அன்புக்குரியவர்களை இழந்த இலங்கை மக்களுக்கு என் இரங்கல்கள். பாதிக்கப்பட்ட அனைத்து குடும்பங்களும் விரை வில் மீண்டு வர என்னுடைய பிரார்த்தனைகள். இந்த நெருக்கடியான நேரத்தில், 'ஆப்பரேஷன் சாகர் பந்து'வின் கீழ், கப்பலில் இலங்கைக்கு நிவாரணப் பொருட்கள் மற்றும் முக்கியமான மனிதாபிமான உதவிகளை இந்தியா அவசரமாக அனுப்பி உள்ளது. நிலைமை மேம்படவும் மேலும் உதவிகள் வழங்கவும் தயாராக இருக்கிறோம். இவ்வாறு அவர் குறிப்பிட்டுள்ளார்.