மனித உரிமை மீறலில் ஈடுபடும் தென் ஆப்பிரிக்கா; அதிபர் டிரம்ப் குற்றச்சாட்டு

வாஷிங்டன்: தென் ஆப்ரிக்காவில் மனித உரிமை மீறல்கள் நடக்கின்றன. அவர்களுக்கு நாங்கள் வழங்கும் மானியங்களை உடனடியாக நிறுத்த போகிறேன் என அமெரிக்க அதிபர் டிரம்ப் அறிவித்துள்ளார்.தென் ஆப்ரிக்காவில் நடந்த ஜி-20 மாநாட்டை அதிபர் டிரம்ப் புறக்கணித்தார். அதுமட்டுமின்றி அந்நாட்டு மீது பல்வேறு குற்றச்சாட்டுகளை முன்வைத்து வருகிறார். இதனால் இரு நாடுகளுக்கு இடையே பகை நீடித்து வருகிறது. இந்த சூழலில் இன்று அவர் வெளியிட்டுள்ள அறிக்கையில், அந்நாட்டை கடுமையாக சாடி இருக்கிறார். அந்த அறிக்கையில் அதிபர் டிரம்ப் கூறியிருப்பதாவது:தென் ஆப்ரிக்காவில் நடந்த ஜி20 மாநாட்டில் அமெரிக்கா கலந்து கொள்ளவில்லை, ஏனென்றால், அங்கு மனித உரிமை மீறல்கள் நடக்கின்றன. ப்ளோரிடா ஜி20 மாநாட்டில் தென் ஆப்ரிக்காவுக்கு அழைப்பில்லை. இன்னும் வெளிப்படையாகச் சொன்னால், அவர்கள் வெள்ளையர்களைக் கொன்று, அவர்களின் பண்ணைகளை அவர்களிடமிருந்து பறிக்க அனுமதிக்கிறார்கள்.ஜி20 மாநாட்டின், நிறைவு விழாவில் கலந்து கொண்ட நமது அமெரிக்க தூதரகத்தின் மூத்த பிரதிநிதியிடம் ஜி20 தலைமைப் பொறுப்பை ஒப்படைக்க தென் ஆப்ரிக்கா மறுத்துவிட்டது. தென் ஆப்ரிக்கா எங்கும் உறுப்பினர் தகுதியற்ற நாடு என்பதை உலகிற்கு நிரூபித்துள்ளது. மேலும் அவர்களுக்கு நாங்கள் வழங்கி வரும் மானியங்களை உடனடியாக நிறுத்தப் போகிறோம். இவ்வாறு அதிபர் டிரம்ப் கூறியுள்ளார்.