எம்.கமலா, திருப்பரங்குன்றம், மதுரை.

*திருமணத்தன்று மணமக்கள் பள்ளியறை பூஜையை தரிசிக்கலாமா?

தரிசிக்கலாம். பள்ளியறை பூஜையை தரிசிப்போருக்கு இல்லற வாழ்வு இனிதாகும்.

ஆர்.ஸ்ரீவித்யா, நாகர்கோவில், கன்னியாகுமரி.

*வன்னி, வில்வம், எருக்கு மரங்களை வீட்டில் வளர்க்கலாமா?

வில்வத்தை வீட்டிலும், மற்றவற்றை கோயில் நந்தவனம் அல்லது பொது இடங்களில் வளர்க்கலாம். மூன்றையும் பூஜைக்கு பயன்படுத்தலாம்.

கே.கவிதா, ராமமூர்த்தி நகர், பெங்களூரு.

*திருத்தலங்களில் ஓடும் நதிகளில் நீராடுவது அவசியமா?

மிக அவசியம். வானில் இருந்து விழும் மழையே மலைகளிலுள்ள மூலிகைகளில் கலந்து அருவியாகிறது. பின் நதியாக பெருகி ஓடுகிறது. இதன் கரைகளில்தான் பெரும்பாலும் திருத்தலங்கள் இருக்கும். இங்குள்ள சுவாமிக்கு அபிஷேக தீர்த்தமாக இருப்பதும் இந்நதிகளே. புனிதமான இதில் நீராட பாவம் தீரும். கடவுளின் அருளால் புண்ணியம் சேரும்.

எம்.பாலு, கோவில்பட்டி, துாத்துக்குடி.

*கோயிலில் கொடுத்த திருநீற்றை வீட்டுக்கு எடுத்து வருவது சரியா?

சரிதான். குடும்பத்தினருக்கு கொடுங்கள். மீதமிருந்தால் தினமும் நீங்கள் பூசுங்கள். இதற்காகத்தான் திருநீறு, குங்கும பிரசாதம் கோயிலில் தருகின்றனர்.

பி.ஸ்ரீராம், பீடம்பள்ளி, கோயம்புத்துார்.

*திருவருள், குருவருள் விளக்கம் தேவை.

தெய்வத்தின் அருளைத் திருவருள் என்றும், குருநாதரின் ஆசியை குருவருள் என்றும் குறிப்பிடுவர். இரண்டுமே நமக்கு அவசியம்.

ஏ. மூர்த்தி, புல்லரம்பாக்கம், திருவள்ளூர்.

*கோயில் குளங்களில் பழைய துணிகளை விட்டு விடலாமா?

கூடாது. கோயிலில் உள்ள குளம் புனிதமானது. அதில் துணி துவைத்தல், பல் துலக்குதல், குப்பை கொட்டுதல், கழிவுநீரை விடுதல், பழைய துணிகளை விட்டு விடுதல் போன்ற தீமைகளைச் செய்வது மகாபாவம். இதற்கு பரிகாரம் கிடையாது.

எல்.விஜயா, நெய்வேலி, கடலுார்.

*புங்கம், புன்னை, மகிழ மரங்களின் சிறப்பு என்ன?

இவை மூன்றும் தலமரங்களாக கோயில்களில் இருக்கும். இதில் நறுமணம் மிக்க மகிழம்பூவை எல்லா தெய்வங்களுக்கும் அணிவிப்பது சிறப்பு.

வி.லட்சுமிகாந்தன், பப்பன்கிலேவ், டில்லி.

*காலம் சென்ற என் தாயாரை வழிபட்ட பிறகே கடவுளை வழிபடுகிறேன். சரியா?

இப்படி செய்வது உங்களின் தனிப்பட்ட விருப்பம். ஆனால் கடவுளை வழிபட்ட பிறகே தாயாரை வழிபடுவது சரியான முறை.

எஸ்.அருணாசலம், ராஜபாளையம், விருதுநகர்.

*உறவினர் ஒருவர் இறந்துவிட்டார். திருவிழா பணியில் நான் ஈடுபடலாமா?

உறவினர் பங்காளியாக இருந்தால் இறப்புத்தீட்டு ஏற்படும். துாரத்து உறவினராக இருந்து தீட்டு நேராவிட்டால் தலைக்கு குளித்து விட்டு திருவிழா பணியில் ஈடுபடலாம்.