த.நேரு, வெண்கரும்பூர், கடலுார்.

*வளமுடன் வாழ என்ன செய்யலாம்?

கடன் இல்லாதிருப்பதே வளமான வாழ்க்கை தான்! குலதெய்வம், இஷ்ட தெய்வத்தை வழிபடுங்கள். சங்கடஹர சதுர்த்தியன்று விநாயகருக்கு விளக்கேற்றுங்கள்.

ஏ. மூர்த்தி, புல்லரம்பாக்கம், திருவள்ளூர்.

*கோயில் குளங்களில் நீராடும் போது பழைய துணிகளை விட்டு விடுகிறார்களே...

கூடவே கூடாது. புனிதமான கோயில் குளத்தில் துவைப்பது, பல் துலக்குவது, பழைய துணி, கழிவுநீரை விடுவது, குப்பை கொட்டுவது பெரும் பாவம். இதற்கு பரிகாரம் கிடையாது.

ஆ.மலர்தாசன், குழித்துறை, கன்னியாகுமரி.

*கருடனை தரிசிப்பது நல்லதா?

மகாவிஷ்ணுவின் அருள் இருந்தால் மட்டுமே கருடதரிசனம் கிடைக்கும். அதற்காக காத்திருக்கக் கூட செய்யலாம்.

லீலா, ஜாக்கூர், பெங்களூரு.

*பெற்றோரும் குழந்தையும் ஒரே நட்சத்திரமாக இருக்கலாமா?

இயற்கையான விஷயம் இது... இதற்காக வருந்த தேவையில்லை.

எம்.நாராயணன், சாத்தான்குளம், துாத்துக்குடி.

*இந்த பிறவியில் செய்ய நினைத்த தர்ம செயல்களை அடுத்த பிறவியில் செய்ய முடியுமா?

அடுத்த பிறவியில் யாராக, எப்படி பிறப்போமோ தெரியாது. கடவுளிடம் வேண்டுங்கள். நல்லதே நடக்கும்.

பி.சந்தோஷ், தமிழர் என்கிலேவ், டில்லி.

*அலை பாயும் மனதைக் கட்டுப்படுத்த என்ன வழி?

திருநாவுக்கரசர் பாடிய 'நிலைபெறுமாறு எண்ணுதியேல் நெஞ்சே நீ வா' எனத் தொடங்கும் பாடலை தினமும் பாடுங்கள். 'ஓம் நமசிவாய' என ஜபித்தபடி சிவன் சன்னதியை திங்கட்கிழமையில் சுற்றுங்கள்.

டி.பாபு, திருப்பூர்.

*குழந்தை பெயரில் எப்போது அர்ச்சனை செய்யலாம்?

ஒரு வயது முடிந்ததும் ஆயுள் ஹோமம் நடத்திய பின் அர்ச்சனை செய்யலாம்.

எம்.கோமதி, பசுமலை, மதுரை.

*பிறவி எப்போது வரை நம்மை தொடரும்?

ஆசைகள் நிறைவேறாமல் ஆன்மா சாந்தி அடையாது. ஆசை இருக்கும் வரை பிறவி தொடரும்.

கே.கமலா, வேளச்சேரி, சென்னை.

*சுபநிகழ்ச்சியை கரிநாளில் நடத்தலாமா?

பெயரிலேயே 'கரி' வருவதால் சுபநிகழ்ச்சியை நடத்தக் கூடாது.