ஏ.வெங்கடேசன், வரதப்பன்பேட்டை, காஞ்சிபுரம்.

*காணிக்கையாக திருமாங்கல்யத்தை செலுத்தலாமா?

செலுத்தலாம். கணவருக்கு உடல்நலக்குறைவு நேரும் போது இஷ்ட தெய்வத்தை வேண்டி பெண்கள் திருமாங்கல்யத்தை காணிக்கையாக செலுத்துவர்.

அ.ரவீந்திரன், மணிகெட்டி பொட்டல், கன்னியாகுமரி.

*ஆன்மிக யாத்திரை செல்லும் முன் குலதெய்வ வழிபாடு கட்டாயம் என்கிறார்களே...

கட்டாயம். குலதெய்வ கோயிலுக்கு செல்ல முடியாவிட்டால் வீட்டிலேயே காணிக்கை முடிந்து வைப்பது நல்லது.

அ.வேலுச்சாமி, ராமநாதபுரம், கோயம்புத்துார்.

*நித்ய கல்யாணி, ஊமத்தம்பூ சுவாமிக்கு உகந்ததா?

நித்ய கல்யாணி பூவை சாத்தும் வழக்கமில்லை. ஊமத்தம் பூவைச் சாத்தலாம். 'உன்மத்த சேகரன்' (ஊமத்தம்பூவை அணிபவன்) என்ற பெயரும் சிவனுக்கு உண்டு.

என்.லட்சுமி, சாத்துார், விருதுநகர்.

*கால பைரவருக்கு பாகற்காயில் தீபம் ஏற்றுகிறார்களே...

ஏற்றக்கூடாது. நம் மரபுகளை மட்டும் வழிபாட்டில் பின்பற்றுங்கள்.

டி.குந்தவை, ஆவடி, திருவள்ளூர்.

*கிராமத்தை போல நகரத்தில் கோயில் விழாக்களில் மரபை பின்பற்றுவதில்லையே...

கிராமத்தில் ஒரே மொழி, ஒரே இன மக்கள் வாழ்வதால் மரபை மீறாமல் ஒற்றுமையுடன் விழா நடத்துகின்றனர். நகரத்தில் பல மொழி, பல இன மக்கள் வாழ்வதால், அவர்களை ஒன்று சேர்த்து விழா நடத்துவது கஷ்டம். அதனால் மரபு பின்பற்றப்படுவதில்லை.

ஏ. கிருஷ்ணகுமாரி, டில்லி.

*அமாவாசையன்று மஞ்சள்பிள்ளையார் வைத்து பூஜிப்பது சரிதானா..

அமாவாசையன்று தர்ப்பணம் கொடுத்து விட்டு பூஜை செய்ய வேண்டாம். கோயில் அர்ச்சகர்களுக்கு இந்த விதி பொருந்தாது.

பி.சுவாதி, பெங்களூரு.

*பள்ளிகொண்ட நரசிம்மர் சிலையை கொலுவில் வைக்கலாமா?

வைக்கலாம். தற்காலத்தில் புதுமை என்ற பெயரில் தேவையற்ற பொம்மைகளை விற்கின்றனர். அவற்றை தவிருங்கள்.

எம்.அபிநயா, கழுகுமலை, துாத்துக்குடி.

*பிரசாதம் சாப்பிட்டதும் சிலர் கோயில் துாணில் துடைக்கிறார்களே...

துடைப்பது கூடாது. பக்தர்களுக்கு தேவையான வசதியை கோயில் நிர்வாகம் செய்வது அவசியம்.

கே.ரமேஷ், கருவடிக்குப்பம், புதுச்சேரி.

*வெளியூரில் இருந்த சகோதரர்கள் இப்போது சொந்த ஊருக்கு வந்து விட்டனர். பெற்றோருக்கு திதியை இருவரும் சேர்ந்து கொடுக்கலாமா?

வெளியூரில் இருந்த காலத்தில் சேர்ந்து, திதி கொடுத்திருந்தால் மட்டுமே இதைச் செய்ய முடியும். தனித்தனியாக திதி கொடுத்திருந்தால் அதையே தொடருங்கள்.