| மண்ணை மலரச் செய்யும் மண்புழு உரம்: தோட்டத்திலேயே தயாரிப்பது எப்படி? Dinamalar
மண்ணை மலரச் செய்யும் மண்புழு உரம்: தோட்டத்திலேயே தயாரிப்பது எப்படி?
Advertisement
 

பதிவு செய்த நாள்

06 டிச
2018
23:46

பொள்ளாச்சி:இயற்கை விவசாயிகளின் தீவிர பிரசாரத்தால், 'உழவனின் நண்பன் மண்புழு' என்ற விழிப்புணர்வு பெரும்பான்மையான விவசாயிகள் மத்தியில் ஏற்பட்டுள்ளது.ஆனால், மண் புழு உற்பத்தி மற்றும் மண்புழு உர உற்பத்தியில் ஈடுபடும் விவசாயிகள் குறைந்த அளவே உள்ளனர்.குறைந்த முதலீடு மற்றும் பராமரிப்பில், தங்கள் தோட்டத்திலேயே மண்புழு உரம் உற்பத்தி செய்து கொள்ளலாம்.


தேவைக்கு போக மீதமுள்ள உரத்தை, சக விவசாயிகளுக்கு விற்பனை செய்து வருவாய் ஈட்டலாம்.மண்புழு உர உற்பத்தி செய்யும் முறைகள் குறித்து, அனுபவ விவசாயிகள் கூறியதாவது:விளைநிலத்தில் நிழலான பகுதியில், ஒரு சென்ட் இடம் தேர்வு செய்ய வேண்டும். அங்கு, 10 அடி அகலம், 15 அடி நீளத்தில், நான்கடி உயரத்தில் கான்கிரீட் தொட்டி அமைக்க வேண்டும். தொட்டிக்கு மேற்கூரை அமைக்க வேண்டும்.


தொட்டியில், அரை டன் செம்மண், அதன் மீது ஒரு டன் காய்கறிக்கழிவு அல்லது மக்கிய மண்ணை பரப்ப வேண்டும். 20 நாட்கள் கழித்து, அதன் மேல் ஒரு டன் மாட்டுச்சாணம் கொட்ட வேண்டும். அடுத்த, 10 நாட்கள் கழித்து, மாட்டுச்சாணத்தின் மீது ஐந்தாயிரம் மண் புழுக்களை விட வேண்டும்.மேற்பகுதியில் தேங்காய் நார் பரப்பி, இரண்டு நாட்களுக்கு ஒரு முறை தண்ணீர் தெளிக்க வேண்டும். ஒரு மாதம் கழித்து, வாரம் ஒரு முறை மண்புழு உரத்தை சேகரிக்க துவங்கலாம். இதன் மூலம் ஒன்றரை டன் மண்புழு உரம் கிடைக்கும்.காய்கறி கழிவுகள், வைக்கோல், காய்ந்த சருகுகள், சாணஎரு, கோழிஎரு ஆகியவை மண்புழுக்களுக்கு சிறந்த உணவாகும். மண்புழுக்களுக்கு உணவை விட தண்ணீர் மிகவும் அவசியம்.


உண்ணும் உணவில், 30 முதல், 40 சதவீதம் வரை தண்ணீர் இருக்க வேண்டும்.மண்புழு உரத்தில் இரும்பு, துத்தநாகம், மக்னீசியம், மாங்கனீசு போன்ற நுண்ணுாட்ட சத்துக்கள் அதிக அளவில் உள்ளன. மேலும், ஹார்மோன்கள், வைட்டமின்களும் உள்ளன. இதனால் மண்புழு உரமிடப்பட்ட பயிர்கள் நன்றாக வளர்வதோடு, மகசூலும் அதிகரிக்கிறது.மண்ணில் வாழும் நுண்ணுயிர்களுக்கு உணவாகவும் பயன்படுகின்றது. மண்ணின் ஈரத் தன்மையை நிலை நிறுத்தும் திறனும் அதிகமுள்ளது.இவ்வாறு, தெரிவித்தனர்.

 

Advertisement
மேலும் கோயம்புத்தூர் மாவட்ட  செய்திகள் :
முக்கிய செய்திகள்
பொது
பிரச்னைகள்
சம்பவம்


We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X