Dinamalar

புதுச்சேரி : மகளிர் மேம்பாட்டுத் துறையில் தகுதியற்ற நபர்களுக்கு மாதாந்திர உதவித்தொகை வழங்கப்படுகிறது என கிழக்கு அ.தி.மு.க., மாநில செயலாளர் அன்பழகன் குற்றம் சாட்டியுள்ளார்.அவர் அளித்த பேட்டி:பெண்கள் மற்றும் குழந்தைகள் மேம்பாட்டுத் துறையின் நிதியுதவி திட்டத்தில் சில தொகுதியில் பல்வேறு முறைகேடுகள் நடந்து வருகிறது.

தகுதியற்ற நபர்களுக்கு மக்களின் வரிப்பணம் குறுக்கு வழியில் செல்ல, இத்துறையின் தவறான செயல்பாடே காரணம். இது சம்பந்தமாக துறை அமைச்சரிடம் கூறியும் எந்த நடவடிக்கையும் எடுக்கவில்லை. ஆட்சிக்கு ஏற்பட்டு வரும் அவப்பெயரை தடுக்கும் விதத்தில், முதல்வரின் கவனத்திற்கு இப்பிரச்னையை கொண்டு செல்ல இருக்கிறேன்.தகுதியற்ற நபர்களுக்கும் ஆதரவாளர்களுக்கும் குறுக்கு வழியில் மாதாந்திர உதவித்தொகை பெற்றுத் தரும் உப்பளம் எம்.எல்.ஏ.,வின் செயலுக்கு இயக்குனர் துணை நிற்பது குறித்து நிதி செயலர், தலைமை செயலரிடம் ஆதாரத்துடன் புகார் அளிக்கப்படும்.ஜிப்மர் மருத்துவர்கள் வெளியே உள்ள மருந்தகங்களில் கமிஷன் வாங்குகின்றனர். குறைந்த விலை மருந்துகளை கூட நோயாளிகளுக்கு கொடுப்பதில்லை. 80 சதவீத மருந்துகளை வெளியில் வாங்குமாறு கூறுவதால் நோயாளிகள் பாதிக்கப்படுகின்றனர். இதனை தடுத்து நிறுத்த வேண்டும்.இவ்வாறு அவர் கூறினார்.