Dinamalar

தூய்மை பாரத இயக்கத்தின் சார்பில், ஒவ்வொரு ஒன்றியத்திலும் ஒரு முன்மாதிரியான ஊராட்சி தேர்வு செய்யப்பட்டுள்ளது.அதில் சூலூர் ஒன்றியத்தில் கிட்டாம்பாளையம் ஊராட்சி முன் மாதிரி ஊராட்சியாக தேர்வு செய்யப்பட்டுள்ளது.இதையடுத்து, தூய்மை பணிகளில் ஊராட்சி நிர்வாகம் தீவிர கவனம் செலுத்தி வருகிறது. ஒவ்வொரு வீட்டுக்கும் மக்கும் மற்றும் மக்காத குப்பையை சேகரிக்க தனித்தனியாக கூடைகள் வழங்கப்பட்டுள்ளன.
கண்ட இடங்களில் குப்பை கொட்டுவதை தடுக்க, குறிப்பிட்ட இடங்களில், பிளாஸ்டிக் டிரம்கள் வைக்கப்பட்டுள்ளன.ஊராட்சியை தூய்மையாக வைத்திருக்க வலியுறுத்தி பொதுமக்களிடம் விழிப்புணர்வு பிரசாரம் செய்யப்படுகிறது
ஊராட்சி தலைவர் சந்திரசேகர் கூறியதாவது:வீடும், ஊரும் சுத்தமாக இருக்க வேண்டும் என்றால், வீடு தேடி வரும் தூய்மை பணியாளர்களிடம் மக்கும் குப்பை, மக்காத குப்பையை தனித்தனியாக பிரித்து வழங்க மக்களுக்கு அறிவுறுத்தி உள்ளோம்.
பொது இடங்களில் குப்பை கொட்டுவதையும், மலம் கழிப்பதையும் தடை செய்துள்ளோம். நோய் பரவாமல் இருக்க கழிப்பறையை பயன்படுத்த அறிவுறுத்தி வருகிறோம். பொது வெளியில் குப்பை கொட்டுவோரிடம் இருந்து, ரூ. 1000 அபராதம் வசூலிக்கப்படும்.
குப்பை கொட்டுவோர் குறித்து புகைப்பட ஆதாரத்துடன் ஊராட்சிக்கு தகவல் தெரிவித்தால், அவர்களுக்கு ஒரு வருட குடிநீர் வரி இலவசமாக்கப்பட்டுள்ளது. தகவல் தெரிவிப்போர் பெயர்கள் ரகசியமாக வைக்கப்படும்.இது குறித்து ஊராட்சி முழுக்க அறிவிப்பு பலகைகள் வைத்துள்ளோம். தூய்மை கடைபிடிக்க மக்கள் ஒத்துழைக்க வேண்டும்.இவ்வாறு, அவர் கூறினார்.